Por E.P. | A CORUÑA | 15/07/2019 | Actualizada ás 13:40
A conselleira de Medio Ambiente, Territorio e Vivenda, Ángeles Vázquez, solicitou este luns aos concellos galegos a súa colaboración para que o orzamento reservado ás políticas de vivenda, máis de 50 millóns de euros en 2019, chegue a todos os galegos.
Así o puxo de manifesto durante un encontro con representantes dos concellos da provincia da Coruña para abordar as diferentes liñas de programas que o Instituto Galego da Vivenda e Solo ten deseñado para facilitar a rehabilitación e o acceso á vivenda.
Vázquez explicou que o Goberno galego fai un "esforzo investidor", que se traduce en 52,96 millóns de euros, dos cales 26,41 destínanse a medidas e programas orientadas á rehabilitación; mentres que a parte restante (26,55 millóns de euros) se reserva para iniciativas que teñen como obxectivo garantir o acceso á vivenda, onde destacan as axudas dirixidas aos máis novos e vítimas de violencia de xénero.
Así mesmo sinalou que aínda está aberto o prazo para solicitar unha axuda no marco da primeira orde para a adquisición de vivendas en centros históricos dirixida especificamente ao colectivo de menores de 35 anos, e que está dotada de 800.000 euros.
PROGRAMAS ESPECÍFICOS PARA CONCELLOS
A conselleira de Medio Ambiente indicou que tamén se deseñaron tres programas dirixidos especificamente aos concellos "que en moitas ocasións teñen proxectos e iniciativas que quedan en ideas por falta de orzamento".
Ademais, resaltou que o tres programas de subvencións implican pór a disposición das administracións locais preto de 8,5 millóns, para que se poidan levar a cabo actuacións de rehabilitación.
Por último, Vázquez destacou que Galicia é pioneira en materia de rehabilitación, xa que "é a primeira rexión en dispor dunha normativa específica en materia de rehabilitación".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.