O programa Principia favorece a contratación de 110 mozos en empresas de investigación

A Xunta apoia a contratación de 110 mozos cualificados, de ata 35 anos de idade, para a realización de actividades de I+D+i en 77 empresas e organismos de investigación de Galicia a través do programa Principia, cuxa cuarta edición resolveu a Axencia Galega de Innovación (Gain).

Cun investimento público de 1,1 millóns de euros (10.000 euros por contrato dunha duración mínima dun ano), estímase unha mobilización total superior aos 2,6 millóns de euros, indicou a Xunta a través dun comunicado.

O obxectivo deste programa é "favorecer a retención de talento" en Galicia, fomentar o desenvolvemento da carreira profesional dos mozos e "estimular a demanda por parte do sector público e privado de persoal suficientemente preparado para realizar tarefas de I+D+i".

Da análise das axudas concedidas, que se prevén publicar no Diario Oficial de Galicia (DOG) deste mércores, destaca o incremento do 30% no número de entidades beneficiarias con respecto á convocatoria anterior. Ademais, preto de 9 de cada dez entidades beneficiarias son empresas e, destas, case a metade son micropemes, o que "mostra que se consolida a existencia dunha área de I+D+i nas empresas" galegas.

En canto ás características dos contratos, preto de 8 de cada dez serán de carácter indefinido e a retribución bruta anual media a percibir polo persoal técnico contratado ascende a 22.832 euros. Ademais, o 95% das persoas contratadas recibirán un plan de formación a cargo da empresa.

Outro dato relevante, explica a Xunta, é que o 46% dos mozos contratados carecía de experiencia laboral previa, "polo que este programa confírmase como unha boa ferramenta para favorecer a empregabilidade do persoal técnico en I+D+i", destacan.

Sumado ao tres edicións anteriores, este programa lanzado en 2016 permitiu a contratación de 472 profesionais de ata 35 anos en actividades de I+D+i.

Científica na Unidade Mixta de Investigación | Fonte: ganadores.gal.