A Xunta denuncia que Galicia é a autonomía que menos fondos recibe para políticas activas de emprego

A Xunta de Galicia acusou o Goberno central de "castigar" a Galicia na repartición de fondos para políticas activas de emprego a pesar de que se trata da autonomía que máis baixou en termos de paro, un 8,7%. Así o denunciou a secretaria xeral de Emprego, Covadonga Toca, que asegurou que o Goberno estatal non ten en conta "nin a efectividade das iniciativas en materia laboral, nin o seu grao de execución".

Na LXXV Conferencia Sectorial de Emprego e Asuntos Sociais, a secretaria xeral sinalou que Galicia contará con 179,5 millóns de euros, o que supón un 5,5% máis que en 2018. No entanto, en relación a esta cifra, o índice de crecemento con respecto aos exercicios anteriores reduciuse dun 14% en 2017 e un 8,7% en 2018.

Respecto diso, Covadonga Toca indicou que "agora se priman, entre outros criterios, o número de oficinas de emprego ou o número de asalariados en centros especiais de emprego". "Son aspectos importantes para garantir o financiamiento destas estruturas, pero deberían fixarse atendendo tamén á efectividade e ao grao de cumprimento destas políticas", asegurou.

Ademais, denunciou que coa actual repartición dos fondos establecido polo Ministerio de Traballo, Migracións e Seguridade Social, non se atende a outro tipo de investimentos "necesarios" como son a modernización e a dixitalización do Servizo Público de Emprego.