Morre un home na praia de Perbes

Un home faleceu na tarde deste luns despois de ser rescatado da auga na praia de Perbes do concello coruñés de Miño. O suceso ocorreu sobre as 16,00 horas, momento no que varios particulares alertaron ao 112 Galicia de que un home fora rescatado da auga. Ademais, indicaban no seu relato que varias persoas estaban a tentar reanimar á persoa.

Desta maneira, o Centro Integrado de Atención ás Emerxencias (CIAE) puxo os feitos en coñecemento do 061-Urxencias Sanitarias e dos axentes da Garda Civil. Tamén foron informados os socorristas da praia, aínda que os medios desprazados ao lugar confirmaron que o home estaba xa fóra da auga.

Con todo, e a pesar dos esforzos dos efectivos sanitarios, nada puideron facer por salvarlle a vida ao home.