Por Europa Press / Redacción | SANTIAGO DE COMPOSTELA | 07/09/2019 | Actualizada ás 13:39
O Servizo Galego de Saúde (Sergas) habilitará unha vía rápida de actuación para casos de condutas suicidas para facilitar o acceso á atención especializada aos pacientes con este risco e mellorar a súa accesibilidade ao sistema sanitario para un adecuado diagnóstico e tratamento.
Diso informou a Consellería de Sanidade nun comunicado, no que explica que este foi un dos acordos alcanzados no Consello Interdepartamental de Coordinación para a prevención e atención das condutas suicidas en Galicia. Na reunión, ademais, aprobouse a utilización do 061 como teléfono único de suicidio, tanto para as persoas en risco como para a súa contorna.
Así mesmo, acordouse avanzar na colaboración co Instituto de Medicamento Legal de Galicia (Imelga) para mellorar a información sobre o suicidio e levar a cabo programas asistenciais en grupos de risco, como a familia ou os achegados de falecidos por suicidio. Ademais, priorizarase a formación dos profesionais do ámbito sanitario, social e educativo e profundarase nun convenio de colaboración sobre esta materia coa Universidade de Santiago (USC).
CONSELLO INTERDEPARTAMENTAL DE COORDINACIÓN
A Xunta lembrou que o Consello Interdepartamental de Coordinación para a prevención e atención das condutas suicidas en Galicia naceu para fomentar a coordinación en materia de prevención do suicidio entre os diferentes sectores implicados.
E é que, conforme sinalou Sanidade, o problema da conduta suicida require para a súa abordaxe a atención desde diversos ámbitos, polo que é necesaria unha correcta colaboración e coordinación entre as distintas institucións implicadas.
Entre as funcións deste órgano están a de supervisar a implantación do Plan de Prevención do Suicidio en Galicia, valorar a información sobre os indicadores das medidas estratéxicas do plan e as accións de coordinación desenvolvidas.
No participan, ademais da Consellería de Sanidade, representantes das consellerías de Xustiza, Educación e Política Social, do 061, do Imelga, así como da Federación de Asociacións de Familiares e Persoas con Enfermidade Mental de Galicia (Feafes).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.