Feijóo, partidario dun "europeísmo afectivo"
Di que Galicia nunca foi "tan dona do seu destino" como agora.
Por E.P. | SANTIAGO DE COMPOSTELA | 09/09/2019 | Actualizada ás 13:07
O presidente da Xunta, Alberto Núñez Feijóo, destacou este luns que sería "imposible" atopar nas rexións europeas unha época "máis fecunda que esta": "E a razón hai que atopala en Europa", sentenciou, tras o que instou a desenvolver o "europeísmo afectivo".
"Se a calquera de nós se nos pregunta en que outro momento histórico a nosa rexión foi máis libre e gozou de máis benestar, sería imposible atopar unha época máis fecunda que esta. E se nos preguntásemos en que momento do pasado fomos máis donos do noso destino que na actualidade, a resposta sería: en ningún", sentenciou Núñez Feijóo. O presidente galego realizou este discurso en Varsovia, durante a súa participación no Cumio sobre a Diplomacia rexional.
Durante a súa intervención, Feijóo referiuse a a Europa das rexións como un "elemento chave" para desenvolver un "europeísmo próximo, vital, creativo e espontáneo". "Os nosos territorios son un lugar idóneo para desenvolver ese europeísmo á vez efectivo e afectivo", dixo.
Coa súa presenza neste acto, Feijóo quixo subliñar que a comunidade galega é un "exemplo máis" de que hai un rexionalismo que, "lonxe de fragmentar o proceso europeo, enriquéceo e achégao aos cidadáns".
"A Galicia que me honro en representar non soña con independencias ficticias nin con abandonos da familia europea, porque aprendemos que as identidades múltiples suman e engaden valor", dixo. A Galicia, dixo Feijóo, Europa proporcionoulle ", sobre todo, un horizonte novo", permitíndolle "saír dun illamento imposto".
Ao longo da súa intervención, Núñez Feijóo subliñou que Europa non é soamente produto de acordos forxados por políticos, senón tamén "unha consecuencia de contactos humanos, de intercambios comerciais, de influencias culturais que tiveron lugar, precisamente, entre rexións como as que forman parte deste cume".
Ante o risco de que Europa sexa "raptada pola incapacidade para defendela" fronte a quen trata de "acabar co seu proxecto de vida en común", o presidente da Xunta lembrou que unha desaparición repentina da Unión Europea que devolvese a unha imaxe de continente "fragmentario", produciría "unha inmensa sensación de desamparo".
