A terminal de Reganosa recibiu tantos buques no que vai de ano como en todo 2018
O incremento de actividade neste campo tamén se reflectiu no aumento dos labores de regasificación.
Por E.P. | SANTIAGO DE COMPOSTELA | 18/09/2019 | Actualizada ás 15:16
Cando aínda restan máis de tres meses para a conclusión de 2019, Reganosa, a terminal de gas natural licuado do porto de Ferrol, xa recibiu este ano tantos buques como en todo 2018, segundo informou nun comunicado.
Desde este xaneiro, ás instalacións propiedade de Reganosa arribaron 16 metaneros: tres para operacións de arrefriado e posta en gas, e outros 13 para realizar descargas, a mesma distribución de servizos que a rexistrada no conxunto de 2018. Ata o momento, o último barco en chegar á terminal de Mugardos foi o "Maran Gas Troy", que atracou o luns e partiu o martes.
O seu paso pola ría de Ferrol fixo que dentro desta última chegasen a coincidir esta semana ata catro grandes gaseiros: o xa citado, con 294 metros de eslora, máis outro tres que actualmente se atopan no estaleiro da cidade (o "Pskov", de 300; o "British Emerald", de 288; e o "Neptune", de 283). Tras a descarga do "Maran Gas Troy", suman xa 1.325.509 os metros cúbicos de gas natural licuado (GNL) recibidos por Reganosa no seu terminal no que vai de exercicio.
En agosto, o complexo emitiu 1.608.198.942 quilowatts hora, un 162,2% máis que no mesmo mes de 2018. Funcionou ao 45% da súa capacidade máxima, sete puntos por encima da media do sistema español, mentres que en xullo fíxoo ao 39%, fronte ao 21% contabilizado nas restantes plantas do país.
