Por X.M. Fernández | Ourense | 22/09/2019 | Actualizada ás 10:00
O pasado venres, 20 de setembro, pechaba as portas Termatalia 2019, non sen antes pasarlle o testemuño á provincia arxentina de Entre Ríos, encargada de organizar a edición de 2020.
A secretaria de Turismo entrerriana, Carolina Gaillard, recollía ese ‘testemuño’ de mans do conselleiro de Cultura e Turismo do Goberno de Galicia, Román Rodríguez, do presidente da Deputación de Ourense, Manuel Baltar, e do vicepresidente do comité executivo de Expourense, Jorge Pumar.
Así, pois, Entre Ríos asume o reto de organizar este encontro termal en America Latina para o vindeiro ano contando co apoio do gobernador Gustavo Bordet e dos empresarios que contan con 16 complexos termais na zona.
Aínda que se clausurou o foro este venres, este sábado seguirá habendo actividades relacionadas con Termatalia xa que visitantes de 34 países realizarán algunhas rutas termais organizadas a Cortegada e Melgaço, organizada polo proxecto Raia Termal e a da Eurocidade Verín-Chaves Vidago.
Éxito en definitiva á edición deste ano, que converteu a Ourense no epicentro do termalismo mundial, acolleu preto de 6.000 visitas procedentes de 34 países e acolleu tres eventos internacionais de excepcional relevancia: o Congreso Internacional de Termalismo 2021-2027, o Simposio Internacional sobre Auga e Calidade de Vida e Termatalia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.