Ribeira e A Pobra insiren anuncios en castelán na revista de GB

A asociación sen ánimo de lucro “Galicia Bilingüe”, que se autodefine como “apartidista e independiente” vén de presentar recentemente en Vigo unha revista de vintecinco páxinas denominada “Vosotros” (dispoñible en dúas versións, unha en castelán e outra en castelán e galego na páxina www.galiciabilingue.es). Esta revista ten o apoio económico de dous concellos galegos, o de Ribeira e da Pobra –ambos gobernados polo PP-, este último cunha páxina completa a toda cor anunciando a súa marca turística en castelán, segundo denuncian os voceiros do Psoe e do BNG deste concello.

"En ambas versións, castelán e “bilingüe”, o Concello da Pobra anúnciase institucionalmente en castelán, posicionándose dentro desa suposta liberdade de elección do idioma que di defender “Galicia Bilingüe” a favor do castelán, utilizando o medio de expresión desa asociación como plataforma para a definición da preferencia política do Sr. Maceiras", sinala nun escrito os socialistas.

Deturpación do topónimo

A revista, que debe ser o vehículo de expresión do que o colectivo que a edita entende por "pluralismo lingüístico", repite na súa curta estensión o topónimo castelanizado “Puebal del Caramiñal” -ou abreviado como “Puebla" ou "La Puebla", en máis dunha ducia de ocasións, "sen que ao Sr. Maceiras lle trema o pulso á hora de asociar a imaxe da vila co perfil editorial da publicación, a pesar da utilización impropia e reiterada do nome do concello, sen amosar respecto algún polos graves sucesos producidos nos anos oitenta e noventa en torno ao emprego ilegal do topónimo histórico castelanizado", apunta o PSdeG en nota de prensa.

"O caso do Concello da Pobra é especialmente grave porque esta última acción do Goberno do PP é a última dunha serie delas que están a supoñer unha involución no uso e promoción da lingua galega por parte da institución local. Ademais, insire a publicidade nunhas páxinas referidas á comarca e ao escritor Victoriano García Martí onde, repetidamente, se fala de “La Puebla”, “Puebla del Caramiñal”,  e “Puebla”. Consideramos inaceptábel que o alcalde de todas e todos os pobrenses permita, e colabore quizáis con cartos públicos, a deturpación do noso topónimo. Unha vez máis, o sr. Maceiras deixa ben ás claras con este tipo de actuacións que el non é o alcalde de todos e todas e, moito menos, o pacificador social que, a respecto do idioma no noso concello, di ser", sinalan en nota de prensa dende o BNG.

Os únicos de toda Galicia

.

"A publicidade institucional dos concellos da Pobra e Ribeira na revista dunha Asociación que ten atacado en incontábeis ocasións á lingua propia dos galegos e galegas, nomeadamente no ámbito do Ensino, que ten como obxectivo que o galego desapareza da Galiza e que emprega como argumento principal que o galego se impón aos cidadáns e cidadás, lévanos a concluír que nin o Goberno Municipal da Pobra nin o de Ribeira teñen o máis mínimo respecto pola lexislación lingüística vixente e, dende logo, tampouco polas veciñas e veciños aos que representan", rematan os nacionalistas da Pobra.

Ribeira e A Pobra son os únicos concellos de Galicia que apoian económicamente esta revista. Curiosamente, os dous concellos tiveron que acudir ao plan de axuste para lles pagar a proveedores. En concreto o da Pobra é o municipio máis endebedado por número de habitantes de toda Barbanza.

Coa colaboración do xornal colaborador Certo