A cooperación entre entidades sen ánimo de lucro e empresas, a debate en Pontevedra

O Rotary Club e o Foro Empresa Pontevedra organizarán o próximo mes de decembro o 'I Encontro Empresarial Social', no que se abordarán as oportunidades de cooperación entre entidades sen ánimo de lucro e empresas.

Os pormenores deste encontro foron presentados este mércores nun acto no que participaron Arturo Ramírez, presidente de Foro Empresa Pontevedra, Sindo López, presidente de Rotary Pontevedra, Jesús Rey, presidente de Aje Pontevedra, Manuel Miranda, en representación de AEMPE, e Uxía Diz, en representación de ISCEM.

Segundo explicaron, esta xornada sobre a Responsabilidade Social Empresarial pretende ser o "nexo de unión" entre empresas e asociacións locais con proxectos de ámbito social, ambiental, cultural e deportivo orientados ao fomento do emprego e da igualdade e á integración de colectivos en risco de exclusión social.

O evento terá lugar o próximo 13 de decembro no Liceo Casino de Pontevedra e será inaugurado polo vicepresidente da Xunta, Alfonso Rueda.

O obxectivo desta xornada é facilitar que entidades sen ánimo de lucro con proxectos obteñan financiamento por parte de empresas que aposten por "un modelo máis igualitario, responsable e sustentable".

Baixo un formato "ameno e dinámico", empresas locais exporán os seus obxectivos no marco da Responsabilidade Social Empresarial, e, a continuación, serán as asociacións participantes as que presentarán de forma breve os seus proxectos ante distintos representantes do tecido empresarial da comarca.

Emprendemento.