O Parque Nacional das Illas Atlánticas xa ten un plan de autoprotección para xestionar emerxencias

A conselleira de Medio Ambiente, Territorio e Vivenda, Ángeles Vázquez, avanzou este martes que a Dirección Xeral de Patrimonio Natural xa elaborou o primeiro plan de autoprotección do Parque Nacional Marítimo Terrestre das Illas Atlánticas de Galicia, co que se pretende garantir a xestión das situacións de emerxencia que poidan ocorrer nas illas.

Tal como explicou Vázquez, trátase dun plan que xa está operativo desde este mesmo martes e que pretende dotar ao espazo natural dunhas ferramentas de planificación propias que melloren a capacidade de resposta e de facer fronte ás posibles emerxencias que se puidesen presentar.

Segundo a conselleira, o feito de que o parque conte cun plan de autoprotección é de "grande importancia" para poder establecer os recursos humanos e materiais necesarios, así como as secuencias de acción que os grupos de intervención levarán a cabo para conseguir unha xestión "eficaz" das situacións de emerxencia que se puidesen dar.

A conselleira destacou que grazas a este documento dáse resposta a cuestións "de moita importancia" para a conservación e proxección dos valores das illas, como a de fixar as actuacións ante un risco de incendio ou calquera outro incidente que poña en perigo ás persoas, actividades e bens materiais ou naturais.

INTERVENCIÓN INMEDIATA

"O plan de autoprotección é o documento co que se garante a intervención inmediata dos distintos grupos de acción e persoas implicadas, e permite a coordinación e intervención inmediata das axudas externas", subliñou.

Nel tamén se determinan as responsabilidades para cada unha das emerxencias que poidan ocorrer, así como os procedementos de comunicación e coordinación entre os grupos operativos.

Esta funcionalidade será posible grazas á organización dun equipo humano cunhas funcións específicas, a mellora dos medios materiais para a intervención e a programación periódica de simulacros e exercicios que permitan incrementar o grao de eficiencia na neutralización das posibles ameazas.

Vázquez tamén lembrou que o plan de autoprotección é unha das novidades que se establece coa aprobación do Plan Reitor de Uso e Xestión do Parque, aprobado polo Consello da Xunta a finais do ano pasado.