O Concello de Pontevedra inviste 3,8 millóns de euros na rede de abastecemento de auga en Salcedo

O Concello de Pontevedra aprobou este luns en Xunta de Goberno un novo tramo do abastecemento de auga na parroquia de Salcedo, cun investimento previsto de 3,8 millóns de euros.

Segundo informou en rolda de prensa a portavoz do goberno local, Anabel Gulías, estes traballos están incluídos nas obras comprometidas no novo contrato da auga e serán executados pola empresa Viaqua, adxudicataria do servizo, despois de que se adxudiquen.

Con esta ampliación da rede de abastecemento darase servizo a 531 vivendas da Rubial, O Xistro, A Igrexa, Matalobos, Cabanas, Almuiña, O Carballo do Pazo, O Cruceiro, A Carballa, A Esculca, Campo da Porta, Muimenta, O Birrete, O Casal, O Navalexo e A Armada. As obras inclúen a reposición de todos os viarios que se vexan afectados pola actuación.

Esta actuación na parroquia de Salcedo, a máis extensa do municipio, realizarase por distintas estradas obrigando á empresa construtora a repor o firme das vías con menos de 4 metros, e os carrís, beiravías e zonas de estacionamento das vías con carrís de máis de 4 metros.

Anabel Gulías destacou que con este investimento a parroquia de Salcedo estará conectada integramente á rede de abastecemento de auga, xa que anos atrás o Concello asumiu con fondos propios o abastecemento no lugar de Raiña da Paz así como en todas as vivendas que están orientadas cara á avenida de Vigo.

Para o goberno local "é moi importante finalizar este mandato completando o saneamento do rural e gran parte do abastecemento", manifestou a portavoz do Goberno local.

Anabel Gulías con Lores