BNG e EU esixen a dimisión do alcalde de Fene, tras ser interceptado conducindo bébedo
Ambas as formacións levarán a petición ao pleno municipal que terá lugar a próxima semana.
Por Europa Press / Redacción | SANTIAGO DE COMPOSTELA | 28/11/2019 | Actualizada ás 19:18
O portavoz do BNG de Fene (A Coruña), Juventino Trigo, e a súa homóloga do grupo de Esquerda Unida, Mari Carmen Martínez, solicitaron "a dimisión inmediata" do alcalde do PP, Gumersindo Galego, despois de que fose interceptado conducindo canto triplicaba a taxa de alcoholemia permitida.
"É a única saída responsable e digna que queda", manifestaron tras coñecerse que o rexedor foi sorprendido pola Garda Civil de Tráfico o pasado 10 de novembro, tras a xornada electoral, cando circulaba cunha taxa de alcol en litro de aire expirado de 0,80 miligramos. Por estes feitos, foi xulgado dous días máis tarde e condenado a 600 euros de multa e oito meses de retirada do permiso.
Ambos os grupos avanzaron que levarán a petición de dimisión do rexedor ao pleno que terá lugar o próximo día 5 de decembro.
Juventino Trigo considerou que o suceso protagonizado polo alcalde de Fene "supera todos os límites da ética" e da "dignidade" política. "Cando un cargo público xura ou promete o seu cargo, entre outras cousas, comprométese a cumprir a ordenación xurídica", manifestou.
O portavoz nacionalista considerou que, desde o momento que hai "unha sentenza firme que demostra que cometeu un delito, non queda outra que dimitir". "Xa non cumpre nin o xurado nin o prometido", apuntou.
Ademais, criticou que se dese de baixa das filas do PP para "non ser una mal exemplo" mentres "non ten pensado dimitir da Alcaldía a pesar de ser o peor dos exemplos para todos os veciños de Fene".
Pola súa banda, a portavoz de Esquerda Unida cualificou de "irresponsabilidade absoluta" o feito polo alcalde e foi máis aló ao pedir, ademais da dimisión do alcalde, a de todo o seu grupo de goberno.
E é que Mari Carmen Martínez considera que o grupo de goberno se caracteriza pola "falta de previsión ou de traballo". Unha situación que, conforme indicou, motivou que "algúns traballadores se tivesen que dar de baixa por non ser capaces de soportar a situación que se está dando".
Ademais, Mari Carmen Martínez asegurou que "este goberno está só gobernando para uns poucos". "O que popularmente se chama facer cacicadas. Parece que só se dedican a favorecer os seus votantes", sentenciou.
