A Xunta negociará "a cara de can" para "reverter" o recorte de cotas de pesca da UE para 2020

A conselleira do Mar, Rosa Quintana, afirmou que se buscará "reverter" con "informes" a proposta de Bruxelas de recortes dos Totais Admisibles de Captura (TAC) e cotas para 2020, que ve "negativa, pero non definitiva". Asegura que Galicia vai negociar " a cara de can" para paliar a afectación en especies como a pescada, o xurelo e o lagostino.

Así se expresou na súa intervención no pleno do Parlamento para dar conta da postura galega de cara ao Consello de Ministros de Pesca da UE, que se celebrará o 16 e 17 de decembro, para fixar o que se poderá pescar o ano próximo.

A conselleira recoñeceu que hai unha "difícil situación de partida", coa proposta "substancialmente negativa" da Comisión Europea de rebaixa do 20% na pescada entre augas do Cantábrico Noroeste e Gran Sol, así como un descenso do 48% para o xurelo entre augas do Cantábrico e ao sur de Fisterra.

Cifra en 37 millóns o impacto dos recortes destas dúas especies para 3.700 tripulantes da frota galega. Unha cifra que chega ata case 90 millóns no conxunto da economía galega, avisa. Fronte a iso, avanza que se defenderán "argumentos científicos e técnicos" como "alicerces" ante Bruxelas.

A isto únese que a situación de que o lagostino "é mellor do que propón Bruxelas", polo que considera restritivo o peche da pesqueira.

Por todo iso, a conselleira lanzou este martes a proposta de que as rebaixas ou aumentos de cotas a realizar nunca superen a variación do 15% co fin de que haxa unha aproximación máis suave aos niveis de biomasa a alcanzar.

RECLAMA "LEALDADE" AO GOBERNO CENTRAL

Quintana representará as comunidades autónomas neste Consello de Ministros de Pesca. Dos 36 TAC nos que España ten cotas prevese unha baixada para 18, así como manter as posibilidades de pesca en catro. "Duplica os recortes e divide á metade os incrementos respecto ao ano pasado", lamenta.

De tal forma, a conselleira chamou ao Goberno central a "manter a lealdade" no marco dunha "unidade de acción" coas comunidades para ter "éxito". Por tal motivo, demanda un "respecto que sexa recíproco".

Tamén se prestará atención a outras especies como as de caballa, lirio e peixe espada, que dependen da negociación con Noruega e doutras organizacións pesqueiras.

Ademais, Rosa Quintana chamou a atención sobre que se debe prestar atención en 2020 a outro "elemento desestabilizador" como é o 'brexit'. Apela a aproveitar o tempo de prórroga para negociar por un acordo que manteña o "statu quo" no acceso a augas e mercados.

A OPOSICIÓN CRITICA FALTA DE PESO POLÍTICO

Pola súa banda, Xan Xove (Común da Esquerda) alertou de que esta proposta de recortes "é un dos últimos estrangulamentos que podía aguantar a frota", nun contexto de "expulsión" dos pescadores do mar en favor da acuicultura industrial.

A continuación, Xove reduciu esta intervención de Quintana a "preparar o triunfalismo posterior das correccións que posteriormente" se van facer. Con todo, demanda que o sector quere "estabilidade" para saber "se van poder vivir disto ou non os próximos anos".

"Non temos nin voz nin voto nin veto, ese é o problema da pesca galega", deste xeito resumiu Montse Prado (BNG) as súas críticas á Xunta, pois avisa de que os "criterios políticos son os que pesan á hora de tomar esas decisións".

Nesta liña, coincide en que a proposta para 2020 é "nefasta" para toda a frota. Prado cuestionou "que problemas solucionou" Quintana en dez anos como conselleira.

Patricia Otero (PSdeG) mostrou a súa "preocupación" polas previsións pesqueiras para o próximo ano, polo que empraza a empregar os argumentos científicos, xa que "existe marxe de manobra e mellora".

A deputada socialista sostén que é "fundamental o equilibrio entre os criterios ambientais e socioeconómicos", así como trasladar que en Galicia se pesca con artes "respectables co medio".

Pancho Casal (En Marea) recoñeceu a Rosa Quintana como "unha das conselleiras máis competentes", pero lamenta que outras comunidades como o País Vasco teñan "máis peso político" que Galicia. Tamén aposta pola "sustentabilidade" nun momento de "deterioración do medio ambiente mariño".

En cambio, Teresa Egerique (PPdeG) recoñece que é unha "proposta complicada", pero afea á oposición que "pinta unha Galicia que parece en grao sumo negra". Por iso, defende o traballo da Xunta para "reverter" esta situación.

"Nunca me apartei do meu rumbo", deixou claro na súa réplica a conselleira, quen dixo "non poder permitir" que se afirme que Galicia non ten peso político. "Imos con voz, con voto e con informes", sentenciou Quintana.