A Garda Civil, á captura dos borrachos das ceas de empresa deste mes
As dotacións de Ourense incrementarán os controis de alcol e drogas durante estas datas.
Por Europa Press / Redacción | OURENSE | 10/12/2019 | Actualizada ás 17:59
A Garda Civil de Ourense velará pola seguridade dos desprazamentos debido ás comidas e ceas de empresa na época do Nadal, polo que incrementará a vixilancia sobre o consumo de alcol e drogas.
Segundo informou o Instituto Armado nun comunicado, como en anos anteriores, o Subsector de Tráfico da Garda Civil de Ourense "realizará frecuentes controis de alcol e drogas".En concreto, indica que os controis "se intensificarán durante as festas do Nadal", co fin de "garantir a seguridade de todos os usuarios das vías públicas e de disuadir a intención de conducir a quen inxerisen alcol ou drogas".
Tamén fixo un chamamento á prudencia dos condutores, para "que se absteñan de conducir o vehículo se tomaron bebidas alcohólicas ou drogas" e lembra a Benemérita que o delito de condución baixo a influencia de bebidas alcohólicas "atópase recollido no artigo 379 do Código Penal e pode ser castigado alternativamente con penas de prisión de 3 a 6 meses, multa de 6 a 12 meses, ou traballos en beneficio da comunidade de 31 a 90 días". "E, en calquera caso, con privación do dereito a conducir vehículos a motor e ciclomotores por tempo superior a 1 e ata 4 anos", apostila.
Ademais, lembra que o cumprimento da normativa de circulación por parte de todos os condutores e usuarios da vía, "incide directamente nunha mellora da seguridade viaria e nun descenso importante dos accidentes". "A diversión non está rifada coa seguridade viaria", conclúe.
