Exposicións, congresos e diversos eventos para honrar o bicentenario do nacemento de Concepción Arenal

O próximo 31 de xaneiro conmemórase o bicentenario do nacemento de Concepción Arenal, nome referente na loita polos dereitos da muller e do feminismo galego. É por iso que diversas institucións públicas e entidades cívicas déronse a man para organizar un calendario de eventos e actividades tanto para pór en valor o seu legado como para reivindicar e divulgar unha figura que está de plena actualidade.

A secretaria xeral de Igualdade, Susana López, e o director xeral de Políticas Culturais, Anxo Lorenzo, acudiron xunto con representantes do Ateneo ou do Concello compostelán a un encontro coa Universidade de Santiago de Compostela co obxectivo de pór en común e detallar este programa de accións, que se desenvolverán ao longo deste ano.

Entre elas, exposicións, un gran congreso sobre a figura de Concepción Arenal, concertos e actuacións musicais... Todo parte dunha programación que tamén chegará a municipios como Ferrol, localidade na que naceu e que participa activamente coa USC no deseño deste calendario de eventos.

En declaracións aos medios, o reitor da institución académica, Antonio López, insistiu na necesidade de "pór en valor" e "tributarlle os respectos que merece" a esta figura, a "primeira muller que loitou para acceder ás aulas universitarias" e que se viu obrigada a vestirse de home para poder entrar, a principios do século XIX.

Arenal tivo un papel moi importante na administración, no mundo do Dereito e destacou como pensadora, escritora e referente de gran preocupación social e "profundamente feminista". "200 anos despois", sinalou López, trátase dunha figura de "moitísima actualidade" e que, xunto a outras como Emilia Pardo Bazán e Juana de Vega, debe trasladarse e fomentarse entre toda a sociedade galega.

Nesta liña, a secretaria xeral de Igualdade, Susana López Abella, incidiu na importancia de que as mozas e mozos de hoxe coñezan "figuras tan importantes" e "referentes de onte" que deben permanecer na actualidade. "É fundamental pór en valor e visibilizar as grandes mulleres que ten Galicia", insistiu, ao tratarse de "referentes de todos e todas" que é necesario "lembrar e recoñecer", sobre todo no caso de Concepción Arenal, "unha auténtica pioneira e orgullo de toda Galicia". 

Desde a USC, ademais, bautizouse á biblioteca dedicada a ciencias sociais, xurídicas e políticas co nome da autora e existen liñas de estudos tradicionais en dereito penal e criminología, nos que Concepción Arenal "é toda unha referencia". "Rompeu uns teitos que, daquela, non eran de cristal, senón que eran teitos de formigón armado", concluíu Antonio López.

Reunión polo bicentenario do nacemento de Concepción Arenal. XUNTA | Fonte: Europa Press