O reitor da Universidade da Coruña demanda máis "financiamento estrutural"

O reitor da Universidade da Coruña (UDC), Julio Abalde, tomou posesión do seu cargo, xunto aos demais membros do seu equipo, nun acto celebrado no reitorado coruñés e que contou coa presenza, entre outras autoridades, do presidente da Xunta, Alberto Núñez Feijóo.

No seu discurso, o novo reitor defendeu que a estrutura do actual plan de financiamento do Sistema Universitario Galego (SUG) vai "no bo camiño", aínda que considerou necesario incrementar a partida destinada ao "financiamento estrutural" das universidades galegas. Tamén defendeu a mellora do fondo por resultados.

Pola súa banda, o presidente da Xunta, Alberto Núñez Feijóo, incidiu en que o obxectivo é que o financiamento universitario poida seguir crecendo a través do novo plan de financiamento 2021-2025. Tamén avanzou a publicación en febreiro, no Diario Oficial de Galicia (DOG), da primeira convocatoria de investigadores distinguidos.

Isto permitirá, segundo explicou, que 15 investigadores de alto nivel —cinco na categoría de retención e 10 na de retorno— se incorporen ás universidades galegas este mesmo ano, cunha axuda adicional para desenvolver os seus proxectos de investigación.

"É innegable o compromiso de Galicia coas universidades", argumentou Feijóo, asegurando que "cada día se dedican a elas máis de 1,2 millóns de euros". Ademais, xunto á "recuperación do talento", apelou á importancia da especialización dos campus galegos.

"É o momento de iniciar o procedemento de acreditación formal dos campus de especialización", sinalou na súa intervención ante as autoridades académicas e institucionais presentes no acto.

SEGUNDO MANDATO

Mentres, o reitor asegurou que afronta este segundo mandato, e último, coa "mesma ilusión" que en 2016 e co obxectivo de contar con todos os membros da comunidade univeritaria para impulsar a "expansión" da UDC.

Entre outros, citou proxectos como o da Cidade das TIC, na Coruña, para o que o presidente da Xunta mostrou o apoio da Administración galega, ou o Centro de Investigación de Industria Intelixente, especializado en industria 4.0 e vinculado, especialmente, ao sector naval.

Xunto a iso, apelou á procura da calidade do ensino académico, o que implica, segundo expuxo, "modernizar as titulacións, revisalas e actualizalas" para facilitar o acceso do alumnado a un mercado laboral "cambiante".