A ONCE colabora coa Xunta para lograr un Camiño de Santiago inclusivo coa diversidade funcional
Por E.P. | SANTIAGO DE COMPOSTELA | 19/01/2020 | Actualizada ás 13:42
O conselleiro de Cultura e Turismo, Román Rodríguez, mantivo un encontro con representantes da Fundación ONCE para avaliar o convenio de colaboración que manteñen ambas as institucións para avanzar na inclusión das persoas con diversidade funcional no Camiño de Santiago.
En primeiro lugar, tal e como asegura a Xunta, Galicia "segue facendo avances para facilitar a peregrinación das persoas cegas" con iniciativas como 'Camiño de Santiago: o teu compañeiro do Camiño'.
En concreto, este proxecto inclúe unha solución dixital para mellorar a accesibilidade do percorrido para persoas invidentes ou con problemas de visión a partir da dixitalización de cada unha das etapas do Camiño Francés ao longo do seu percorrido por España.
Ademais, ofrece unha aplicación móbil accesible baseada en audio 3D sobre tecnoloxía de condución ósea, capaz de guiar aos peregrinos e fomentar o seu desprazamento e interacción cos elementos da contorna.
Segundo informa a Xunta, as probas piloto deste sistema de guiado, que se acometeron recentemente, celebráronse "con gran éxito". Así, o Goberno autonómico e o ONCE coincidiron en que se poderán "explorar" novos usos deste proxecto a partir da primavera.
Así mesmo, coa intención de facer máis inclusivo o Camiño de Santiago de face ao Xacobeo 2021, a Administración galega lembra que traballa en liñas complementarias como pictogramas nos albergues, un catálogo-guía de accesibilidade en todos os establecementos e a posibilidade de facer reservas, por primeira vez, para grupos de persoas con discapacidade.
