Xulio Ferreiro asumirá cargos de "confluencia e cohesión" na dirección de Marea Atlántica

O portavoz nacional de Anova e deputado de Común da Esquerda, Antón Sánchez, expresou a súa satisfacción pola volta do exalcalde herculino Xulio Ferreiro á primeira liña política despois de que este figure na lista de consenso que asumirá a dirección política de Marea Atlántica.

"Necesitamos moitas mans como as de Xulio", manifestou Sánchez a preguntas dos medios durante a comparecencia de prensa celebrada tras a xunta de portavoces do Parlamento de Galicia. Alí, evitou "interprentar" que o paso dado polo exrexedor evidencie a súa pretensión de dar o salto á política autonómica nas eleccións galegas deste ano. "É unha persoa comprometida e estará disposto a desenvolver as funcións que crean que é máis conveniente", indicou.

Xulio Ferreiro asumirá a área de 'confluencia e cohesión' dentro da marea herculina. Deste xeito, encargarase das relacións co resto do espazo político de face á inclusión de Marea Atlántica nunha candidatura de unidade popular ante as eleccións autonómicas, un papel que exerce desde decembro en Anova o tamén exalcalde Martiño Noriega.

Xulio Ferreiro, líder da Marea Atlántica | Fonte: EFE