O Defensor do Paciente pide controles de drogas e alcol a persoal sanitario tras o caso do condutor de ambulancia drogado en Ribeira
O home deu positivo en cocaína e anfetaminas.
Por Europa Press / Redacción | SANTIAGO DE COMPOSTELA | 10/02/2020 | Actualizada ás 18:07
O Defensor do Paciente pediu ao ministro de Sanidade, Salvador Illa, que poña en marcha controles de drogas, alcol e enfermidades psiquiátricas ao persoal sanitario como os que se realizan noutras profesións con risco para terceiras persoas.
Nunha carta remitida ao titular de sanidade, a presidenta da asociación Defensor do Paciente, Carmen Flores, lembra ao ministro que esta fin de semana a Garda Civil denunciou ao condutor dunha ambulancia despois de dar positivo nun control de drogas realizado en Ribeira .
Respecto diso, o Defensor do Paciente sinala que "non é nin o primeiro caso no ámbito sanitario nin o último" polo que volve solicitar "o control rutineiro de estupefacientes, alcol e patoloxías psiquiátricas sen previo aviso".
En concreto, a Garda Civil informou de que os feitos transcorreron na estrada DP-7307 no termo municipal de Ribeira, cando a Garda Civil realizou as probas ao condutor dunha ambulancia do 061 que estaba en servizo de garda e non levaba pasaxeiros nese momento.
Tras realizar as probas, a persoa mostrou positivo en consumo de cocaína e anfetamina, polo que o vehículo foi inmobilizado nese punto.
