Cerceda elixe este mércores novo alcalde tras a dimisión de Liñares
No pleno propoñerase ao socialista Juan Manuel Rodríguez.
Por E.P. | A CORUÑA | 11/02/2020 | Actualizada ás 11:02
O Concello de Cerceda celebra este mércores o pleno para a elección do seu novo alcalde, tras a dimisión do que fora o seu rexedor, José García Liñares, despois de confirmar a Audiencia da Coruña a súa inhabilitaicón durante oito anos por un delito de prevaricación administrativa.
Segundo informa o Consistorio, o pleno será ás 21,00 horas e nel propoñerase ao socialista Juan Manuel Rodríguez como novo alcalde nunha corporación na que o PSOE conta con maioría. Previamente, tomará posesión de concelleiro Ángel Gestal, número oito do PSOE.
A sesión plenaria celebrarase cumprindo os prazos legais establecidos e co obxectivo de elixir a un novo alcalde tras a dimisión de Liñares, que deixou o cargo despois de 25 anos á fronte da Alcaldía.
O PSOE, con maioría absoluta, proporá a Juan Manuel Rodríguez García como alcalde, veciño de Cerceda de 29 anos e licenciado en socioloxía pola Universidade da Coruña (UDC). Ata a data, ocupaba a área de Benestar. É afiliado ao PSOE desde o ano 2012 e nos comicios do pasado mes de maio foi o número dous.
