O BNG demanda "máis traballo" nos estaleiros galegos e converter Navantia Ferrol nunha unidade territorial

O deputado do BNG no Congreso, Néstor Rego, esixiu "carga de traballo" nos estaleiros no naval de Ferrol. Pide converter o centro de Navantia Ría de Ferrol (estaleiros de Fene e Ferrol) nunha unidade territorial coa dirección única, con competencias plenas en canto a xestión, que permita optimizar os resultados e maximizar as sinerxías entre as diferentes áreas de actividade.

Os nacionalistas puxeron estas reclamacións por escrito nunha proposición non de lei, que rexistraron este mércores acompañado dunha ducia de traballadores do sector naval de Ferrol, que pousaron ante as portas do Congreso cunha pancarta na que se podía ler "romper as cadeas" e diversificación industrial e carga de traballo".

Néstor Rego instou a que o Goberno "tome as medidas necesarias para garantir de forma inmediata a carga de traballo" ata que se inicie a construción das fragatas, ante a situación de "horas baixas" que está a pasar a comarca e o sector. Por iso, reclaman tamén a execución do programa das fragatas F110 e que se "rompa con ese corpiño" para que se poida construír tamén embarcacións civís.

O deputado nacionalista fixo fincapé na situación que están a pasar moitos dos traballadores da industria de Navantia. "Hai que aprobar de maneira inmediata as medidas necesarias para que o persoal que se vexa expulsado do mercado de traballo pola actual caída de ocupación, poida acceder á xubilación en idénticas condicións que o persoal propio de Navantia", apelou.

Así as cousas, os nacionalistas galegos piden dotar o centro de Fene do persoal necesario de xestión, técnico e produtivo para poder afrontar proxectos no ámbito da construción naval civil. Tamén se propón "negociar" coa Xunta a súa participación no Consello de Administración de Navantia, así como a súa "posible participación no capital social".

Para o Bloque, pódese aproveitar este marco de relación para "lanzar conxuntamente iniciativas destinadas á efectiva industrialización" da comarca de Ferrol, priorizando a industria e servizos complementarios á construción naval.

Traballadores do naval despregan unha pancarta tras rexistrar unha proposición non de lei que impulsa o BNG. BLOQUE NACIONALISTA GALEGO | Fonte: Europa Press