Por Europa Press / Redacción | Vigo | 30/03/2020 | Actualizada ás 10:32
O Sindicato Médico de Galicia CESM-Galicia denunciou ante a Inspección de Traballo e Seguridade Social a "falta" de equipos e material de prevención para evitar contagios por coronavirus entre profesionais sanitarios.
Nun comunicado, a central sinalou que recorreu á entidade pública "para que se emenden as enormes deficiencias de material de protección" para o persoal que traballa con infectados e acusou ao Servizo Galego de Saúde (Sergas) de incumprir a lexislación de prevención de riscos laborais.
Neste sentido, volveu a reclamar de modo "urxente" unha dotación de batas impermeables, máscaras homologadas de distintos tipos, lentes de protección e colectores grandes de residuos para que os traballadores do sector sanitario poidan "combater o virus con certas garantías".
Nesta liña, CESM instou á Consellería de Sanidade a avaliar os "riscos" aos que se enfrontan estes profesionais dun modo individualizado. Así, avogou por que se estuden as circunstancias persoais dos traballadores ante a "proliferación de contaxios" rexistrada entre os mesmos.
Ademais, o sindicato afirmou que esta situación resulta "insustentable" e "perigosa" para os profesionais e os pacientes que acoden aos centros asistenciais públicos da comunidade. Así mesmo, a central acusou ao Sergas de non realizar unha "avaliación de riscos" en relación á actividade que desenvolve o persoal sanitario "desde a detección do COVID-19".
Tamén afirmou que o servizo de sanidade público da comunidade incumpriu "as recomendacións do Ministerio de Sanidade e a Organización Mundial da Saúde (OMS) en relación á necesidade de aplicar as medidas necesarias para que estes traballadores "poidan facer o seu traballo en condicións mínimas de seguridade" e non sexan contaxiados "polos pacientes ou polos seus propios compañeiros". Así, incidiu en que estes organismos incidiron do mesmo xeito na importancia de prover a estes profesionais do material preciso.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.