O sector hostaleiro presaxia "o peor verán da historia" cunha caída de facturación de ata o 40%

O sector hostaleiro estima que a caída da facturación anual dos seus negocios podería situarse entre o 30% e o 40% como consecuencia da crise xerada pola pandemia do coronavirus, segundo a enquisa realizada por Hostalaría de España entre os restaurantes, bares, cafetarías e pubs membros da organización empresarial.

En Galicia, o 6% dos ocupados dedícanse ao sector da hostalaría, unha taxa inferior á media española (do 8,8%). En España xera 1,7 millóns de empregos. En concreto, o 87,67% dos hostaleiros cualifican de peores as vendas do primeiro trimestre deste ano en comparación co mesmo período de 2019, á vez que o 86,31% tamén as sitúan por baixo das realizadas no último trimestre de 2019. En canto ás expectativas, o 90,39% dos hostaleiros enquisados percibe que as vendas do segundo trimestre do ano van ser peores que as do primeiro trimestre ou as actuais, e tan só o 5,85% cre que poden manterse igual.

Os resultados da enquisa tamén recollen as decisións que tiveron que tomar os empresarios hostaleiros desde que se decretou o estado de alarma o pasado 13 de marzo. Así, o 93,02% dos hostaleiros afirma que tivo que cesar temporalmente a actividade, mentres que o 4,66% cesou definitivamente o seu negocio e o 2,33% mantivo servizos de entrega a domicilio. Dos negocios hostaleiros que cesaron temporalmente a actividade, o 75,03% acolleuse a un Expediente de Regulación Temporal de Emprego (ERTE), o 8,61% acolleuse a liñas ICO de financiamento e o 3,88% optou pola opción de vacacións adiantadas.

De feito, o pago da cotización de autónomos é o principal problema ao que se están enfrontando os empresarios hostaleiros, sendo este sinalado polo 80,34% dos enquisados como un dos maiores obstáculos, seguido do pago de taxas e impostos das subministracións de enerxía (sinalado polo 55,77%) e dos impostos de terrazas, IBI ou outras obrigacións de pago ás administracións, como o IVE, que son percibidas como ameazas a curto e medio prazo polo 52,34% dos hostaleiros.

"Os resultados da enquisa son un reflexo da percepción do sector hostaleiro, que xa presaxia que imos vivir o peor verán da historia do noso país e estima que as consecuencias económicas vanse a prolongar ao longo de todo o ano", apunta o presidente de Hostalaría de España, José Luís Yzuel.

"Como organización empresarial que representa aos máis de 300.000 establecementos hostaleiros do noso país, instamos o Goberno a que escoite as peticións dos negocios hostaleiros, a inmensa maioría formada por autónomos e pequenos persoais, porque necesitan que se tomen medidas de urxencia se non queremos levar á quebra a este sector tan importante para a economía e a sociedade española", engadiu.

FORO ECONÓMICO DE GALICIA

O Foro Económico de Galicia prevé un afundimento da economía galega de entre o 5,6% e o 7,4% do Produto Interior Bruto (PIB) polo impacto do estado de alarma a raíz do coronavirus. Nun informe feito público este mércores, o Foro Económico fixa o impacto do confinamento entre os 3.500 e os 4.600 millóns de euros. Esta pinza varía en función de canto dure o estado de alarma.

E é que se o estado de alarma termina o 26 de abril --de seis semanas-- suporá unha perda do 5,6% do PIB, mentres se se amplía oito semanas ata mediados de maio esa caída pode alcanzar o 7,4%.

Nun escenario optimista, o Foro Económico estima que é posible que as perdas poidan xerar un "efecto rebote" por "embalsamento" de decisións de gasto nos próximos meses, a condición de que a crise se resolva pronto e con éxito, co descubrimento de tratamentos eficaces ata que se poida dispor dunha vacina. Así, produciríase a "ansiada curva" en forma de V.

Con todo, o Foro avisa de que a persistencia das medidas de control nos próximos meses e as restricións á mobilidade "poden xerar unha distorsión aínda maior na actividade económica". De feito, non é descartable unha segunda onda da pandemia, algo que prorrogaría no tempo o impacto en sectores como o turismo.

De tal forma, os expertos do Foro estiman que para saír desta crise será necesario "axuntar grandes esforzos" de forma coordinada a "todos os niveis institucionais", internacional, nacional e autonómico. Remarca que se trata dunha crise "global e simétrica", porque afecta tanto á oferta como á demanda, o que dá lugar a tensións na liquidez de familias e empresas. O obxectivo é que no segundo semestre se inicie unha "paulatina" recuperación tras unha "forte contracción" no primeiro.

ERTE

Por outra banda, Galicia rexistra 32.206 Expedientes de Regulación Temporal de Emprego (ERTE) polo estado de alarma, con 205.396 traballadores afectados, a data deste mércores.

Segundo datos da Consellería de Economía, o número de ERTE activos sobe máis dun 1% en 24 horas, así como nos empregados inmersos nesta situación. Por provincias, en Pontevedra hai 67.182 empregados en 11.183 expedientes. Mentres, na Coruña son 57.369 afectados en 12.386 expedientes. Séguenlles Ourense (15.313 traballadores e 3.879 ERTE) e Lugo (13.582 empregados e 3.829 expedientes). 

A nivel autonómico son 15.919 afectados nun total de 929 expedientes a raíz do coronavirus. Tamén hai 36.031 traballadores en ERTE de empresas a nivel estatal que teñen repercusión en Galicia.

PROTESTA DA CIG POLA DEMORA NA TRAMITACIÓN DOS ERTE

A respecto dos ERTE, a Confederación Intersindical Galega (CIG) advirte que a "demora do Servizo Público de Emprego Estatal (SEPE) na súa tramitación "provocará o atraso no recoñecemento do dereito a cobrar unha prestación", o que deixará aos traballadores "sen ingresos" ata que se faga efectivo o proceso. O secretario xeral da CIG, Paulo Carril, reclamou que se articulen "de inmediato", as medidas "necesarias para evitar que se produza" unha situación de desemprego e ausencia de ingresos para os empregados afectados.

Desde a CIG criticaron que esta situación se podería evitar se "desde o primeiro momento se recoñecese o dereito dos traballadores e traballadoras a un permiso retribuído por deber inescusable" e se se articulase un "fondo público de compensación" para as empresas.

En todo caso, Carril subliña que a situación actual é consecuencia das "erráticas medidas adoptadas nos sucesivos Consellos de Ministros". Lamenta que agora exista un "Goberno excedido polos miles e miles de ERTEs presentados" que, "unha vez máis", pagará a clase traballadora "por unha situación da que non é responsable".

Respecto da Xunta, Carril reclamou que Feijóo "goberne Galicia para Galicia" e non se "escude nas decisións adoptadas en Madrid para eludir a súa responsabilidade" en materias nas que "ten todas as competencias. Por todo isto, a CIG fixo un chamamento para que a cidadanía participe nunha "cazolada" este venres 10 de abril ás 12,00 horas, como unha "acción de protesta" coa que se queren demandar "medidas de protección social sen discriminación entre colectivos".

PROGRAMA DE INSERCIÓN LABORAL

A Fundación A Caixa destinará 4,3 millóns de euros a impulsar iniciativas de inserción sociolaboral e vivenda de inclusión social que chegarán a Galicia a través do Programa de Axudas a Proxectos de Iniciativas Sociais.

CAMPAÑA DE PESCA PARA CONSUMO DE PEIXE

A Consellería do Mar lanza a campaña 'Merca produto fresco do mar. Estamos non mesmo barco' co fin de animar ao consumo de peixes ante a situación que atravesa o sector pola crise do coronavirus. Actualmente, unhas 40 lonxas seguen abertas e 2.000 embarcacións activas, mentres 10.000 profesionais do mar traballan para levar a elas 700 toneladas de alimento de calidade cada día co fin de garantir o abastecemento da sociedade durante o confinamento.

Entre outros beneficios, o consumo de peixes achega a vitamina D, cuxo déficit se pode producir durante a reclusión en casa ao non poder saír ao aire libre. A este respecto, a conselleira do Mar, Rosa Quintana, remarcou o "importante" papel da frota galega na cadea de subministracións ante a situación excepcional que implica o estado de alarma. Por iso, esta campaña busca o "recoñecemento" aos traballadores.