Mulleres de máis de 50 anos de zonas urbanas, o principal perfil do teléfono de atención psicolóxica
Soidade ou illamento social foron algúns dos casos máis frecuentes entre as chamadas recibidas polo servizo.
Por Europa Press / Redacción | SANTIAGO DE COMPOSTELA | 11/04/2020 | Actualizada ás 17:28
Máis da metade das persoas que chamaron ao servizo de atención psicolóxica aberto pola Xunta a través do 112 presentaban entre 50 ou 70 anos de idade. A maioría de usuarios do servizo foron mulleres, en concreto o 80 por cento do total, segundo os datos facilitados polo Goberno galego.
As chamadas realizadas, sobre todo, de concellos como Vigo, A Coruña, Ferrol e Ourense, e as provincias da Coruña e Pontevedra aglutinan case o 90 por cento dos casos. O vicepresidente da Xunta, Alfonso Rueda, celebrou unha videoconferencia este sábado coa presidenta do Colexio Oficial de Psicoloxía de Galicia, Rosa Álvarez, e a coordinadora do Grupo de Intervención Psicolóxica en Catástrofes e Emerxencias (GIPCE), Ana Núñez.
Rueda incidiu na importancia de prestar asistencia aos cidadáns desde este punto de vista, en especial aos colectivos máis vulnerables, para atender as consecuencias psicolóxicas derivadas das restricións do Estado de Alarma. "Un das frontes na loita contra o coronavirus ten que ver cos prexuízos emocionais causados polo confinamento", engadiu.
Ansiedade, soidade ou illamento social, foron algúns dos casos máis frecuentes entre as chamadas recibidas polo servizo, posto en marcha o pasado luns. Entre as principais preocupacións dos cidadáns atópase o medo ao contaxio e as perspectivas de futuro tras o levantamento do Estado de Alarma.
Rueda explicou que este tipo de situacións están a incrementar a vulnerabilidade da poboación debido á falta de contacto, polo que con este servizo contribúese a dar resposta a estas novas demandas xurdidas pola evolución do coronavirus.
