Por Europa Press / Redacción | SANTIAGO DE COMPOSTELA | 12/06/2020 | Actualizada ás 11:57
Axentes da Policía Nacional en colaboración con Vixilancia Aduaneira detiveron en Madrid a un funcionario de Aduanas destinado nun patrulleiro en Vilagarcía de Arousa (Pontevedra) por supostos vínculos co narcotráfico.
Os axentes están a investigar a posibilidade de que filtrase información a narcos ou de que xogase "outro rol" na organización do clan Santórum, responsable dunha operación na que foron intervidos 4.500 quilos de cocaína no Atlántico.
Así o informaron a Europa Press fontes próximas á investigación, que relataron que a policía tíñalle collida a pista dende "había dous anos" polo seu "nivel de vida non acorde cos ingresos declarados".
Ante este "tren de vida elevado", con movementos patrimoniais "estranos desde hai dous anos", destacaron as mesmas fontes, este funcionario, membro da tripulación dun patrulleiro en Vilagarcía, foi vixiado.
A súa detención produciuse este pasado mércores en Madrid cando o home, que acudira acompañado á capital supostamente a xestións persoais, se desprazou a un domicilio no que lle foi entregado un paquete. Pouco despois os axentes detivérono con 370.000€ en efectivo.
REXISTROS EN AROUSA
Este xoves realizáronse rexistros na zona de Arousa nunha vivenda relacionada co funcionario arrestado, nos que se acharon "elementos que reforzan os vínculos" deste "co narcotráfico", apuntaron as mesmas fontes.
POSIBLES FILTRACIÓNS
As mesmas fontes consultadas por Europa Press aclararon que este funcionario, polo seu destino na tripulación dun patrulleiro, non tiña acceso á base de datos de pescudas e non investigaba operacións contra o narcotráfico, pero que si acudía a despregamentos relacionados con estas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.