Santiago mantén a incógnita sobre o oferente ao Apóstolo
Bugallo asegurou que non lle corresponde a el "dicir nada" ata que a Casa Real decida facer público o nome "oficialmente".
Por E.P. | SANTIAGO DE COMPOSTELA | 06/07/2020 | Actualizada ás 14:17
Sen novidades para a ofrenda ao Apóstolo. O Concello de Santiago mantén a incógnita acerca da elección do oferente que protagonizará os actos tradicionais con motivo do 25 de Xullo.
Este mesmo luns, o rexedor compostelán, Xosé Sánchez Bugallo, foi preguntado directamente en rolda de prensa, na que asegurou que non lle corresponde a el "dicir nada" ata que a Casa Real decida facer público o nome "oficialmente".
"Penso que non", contestou, referíndose a se repetirá de novo como oferente, aínda que tampouco se descarta do todo á espera de que exista unha confirmación oficial.
En caso contrario, sería o segundo ano consecutivo no que o rexedor asumiría o rol na ofrenda ao Apóstolo. Este papel adoita recaer, á súa vez, no presidente da Cámara autonómica ou no do Goberno galego, que nesta ocasión estarían en funcións debido á proximidade das celebracións coas eleccións autonómicas.
En todo caso, o Goberno local xa está a preparar as medidas de cara ás próximas festividades. Este luns deu o visto e prace á ampliación do horario de peche dos locais de hostalaría durante o Apóstolo e en San Roque, que afectará as noites do 13 ao 31 de xullo e do 7 ao 16 de agosto.
