O Concello de Abegondo estuda declarar a Javier Tebas como persoa non grata

O Concello de Abegondo estuda a declaración como persoa non grata no municipio ao presidente de LaLiga, Javier Tebas. En Abegondo radica a cidade deportiva do Real Club Deportivo, onde desenvolven o seu traballo todas as categorías, e unha situación de risco sobre os traballadores do club constitúe tamén unha situación de risco sobre o municipio e os veciños.

A actuación policial que se seguiu con maior prontitude foi a prestación de declaración do capitán do Dépor, Álex Bergantiños. En todo este tempo, o presidente de LaLiga non só non deu ningún paso para tratar de esclarecer os feitos, senón que se está afanando en confirmar as sospeitas de non actuar conforme aos intereses xerais da cidadanía. É por iso que o goberno local expón a declaración como persoa non grata.

A sucesión dos feitos tras a viaxe do Fuenlabrada á Coruña veu a confirmar o risco sanitario que supuxo para a cidade e a comarca, coa presunta responsabilidade, como el mesmo admitiu, do presidente de LaLiga.

O alcalde de Abegondo, José Antonio Santiso, defende que a xustiza actúe con severidade contra quen creou esa situación de perigo sanitario e investigue os intereses que levaron a esa decisión. “É de xustiza que se investigue a fondo para determinar a culpabilidade de poñer en risco a saúde da cidadanía, sancionando ou condenando sen paliativos aos seus responsables”, asegura o alcalde.

“Nunha pandemia mundial só podemos esixir que a actuación dunha entidade como LaLiga realícese con decoro, lóxica e extremando as medidas sanitarias”, conclúe o alcalde.