Policía e Garda Civil estudan intensificar os controis coas subdelegacións do Goberno
Os responsables policiais reiteraron o compromiso "para manter e intensificar a súa acción tras a entrada en vigor das novas medidas".
Por E.P. | CORUÑA, A | 13/08/2020 | Actualizada ás 17:24
As subdelegacións do Goberno abordaron con Policía e Garda Civil as novas directrices aprobadas pola Xunta de Galicia respecto da xestión e control da COVID-19, así como seguir intensificando os controis.
Así o informan as Subdelegacións do Goberno na Coruña e Pontevedra. No primeiro caso, a subdelegada Pilar López-Riobóo, mantivo unha reunión de coordinación co tenente coronel da Garda Civil e responsable da Comandancia da Coruña, Francisco Jambrina e co xefe superior de Policía de Galicia, José Luís Balseiro.
Segundo a Subdelegación do Goberno na Coruña, o obxecto da reunión foi "coordinar a actuación das forzas e corpos de seguridade do Estado na provincia da Coruña, tendo en conta as novidades introducidas". Os responsables policiais reiteraron o compromiso "para manter e intensificar a súa acción tras a entrada en vigor das novas medidas".
Tamén o trasladou a subdelegada do Goberno na Coruña, que fixo ademais un especial fincapé en "reforzar os posibles dispositivos e accións durante este próximo fin de semana, que concentra posiblemente a maior carga de actividades festivas de todo o ano".
Pola súa banda, a subdelegada do Goberno en Pontevedra, Maica Larriba, que tamén mantivo un encontro por videconferencia con mandos policiais, destacou o papel dos corpos e forzas de seguridade do Estado.
Nun encontro para planificar os operativos necesarios ante a prohibición de fumar en espazos públicos e terrazas se non se cumpre a distancia de seguridade, destacou tamén a colaboración coas policías locais e agradeceu aos alcaldes e alcaldesas o seu labor. Deles, dixo que comprenderon " a necesidade de xuntar criterios para cumprir as normas sanitarias".
