Sanidade agrupa na app 'Passcovid' utilidades para rastrear o virus e facilitar a comunicación cos sanitarios
A descarga e uso da aplicación terá carácter voluntario e estará dispoñible para residentes e visitantes en Galicia.
Por Europa Press / Redacción | SANTIAGO DE COMPOSTELA | 21/08/2020 | Actualizada ás 11:11
A Consellería de Sanidade ultima a posta en marcha da app 'Passcovid' que agrupa utilidades para facilitar a comunicación entre os cidadáns e os servizos sanitarios no marco da crise polo coronavirus COVID-19.
Segundo informou Sanidade, o Diario Oficial de Galicia (DOG) publica este venres a orde da Consellería de Sanidade pola que se regula o sistema de información 'Passcovid', que desenvolve a Xunta como medida complementaria na xestión da crise sanitaria ocasionada pola COVID-19.
A aplicación 'Passcovid', explica Sanidade, "actuará como canle telemática e preferente de contacto con residentes e transeúntes en Galicia, conectada co Servizo Galego de Saúde e a Central de Rastrexo de contacos e a aplicación estatal RadarCovid, como un complemento para o traceo automático de contactos".
A través de 'Passcovid' recibirase o código alfanumérico que debe introducirse en RadarCovid no caso de que, "de forma voluntaria", matiza Sanidade, "a persoa desexe reportar o positivo". Entre as funcionalidades que integran a aplicación galega, destacou Sanidade, inclúese achegar "información relevante e consellos sobre a evolución da COVID-19 en Galicia, anunciar a adopción de medidas ou os protocolos vixentes, e mesmo trasladar recomendacións sobre o modo de como afrontar a actual situación sanitaria".
OPTIMIZAR A XESTIÓN
Coa intención de "optimizar ao máximo a xestión e control da expansión do virus na comunidade", incide a Consellería, "a axilidade da nova ferramenta de participación cidadá, permitirá adoptar medidas adecuadas cunha maior celeridade e precisión segundo evolucione a situación epidemiolóxica".
O novo sistema de información, en fase de pilotaxe na actualidade, estará dispoñible para as persoas usuarias a través dunha aplicación para dispositivos móbiles e poderá ser utilizado por calquera persoa, maior de idade, que resida ou se atope temporalmente na Comunidade galega. Por iso, o acceso e uso da aplicación por menores de idade está limitado a aquelas funcionalidades do sistema que non requiran do tratamento dos seus datos persoais.
Sanidade sinalou que tanto a instalación da aplicación como a habilitación de cada unha das súas funcionalidades e o seu uso "serán sempre voluntarios, garantindo a privacidade e confidencialidade dos datos que se introduzan na mesma". Deste xeito, a Xunta asegura que "agrupa nunha única app un conxunto de utilidades para cidadanía, que servirán de soporte e axuda para os profesionais sanitarios".
PERFIL ANÓNIMO OU PERSONALIZADO
As persoas que descarguen a aplicación 'Passcovid' poderán optar por facelo mediante un perfil personalizado, ou ben, por un perfil anónimo. Este sistema de información 'Passcovid.gal' estará vixente ata a finalización da situación de crise sanitaria, que será declarada polo Goberno estatal ou, de ser posterior, ata o momento da declaración polo Executivo autonómico da finalización da situación de emerxencia sanitaria.
O fin da vixencia do sistema de información será publicado no DOG e, subliña Sanidade, "implicará a inmediata desactivación da app, sen prexuízo de que os datos deban conservarse en cumprimento da normativa sanitaria, ou polo seu valor científico e epidemiolóxico, nese caso conservaranse de forma anónima".
