Drones e dispositivos submarinos para atopar bancos de algas en Galicia
A Xunta prepara unha guía de boas prácticas para a explotación de macroalgas de interese comercial.
Por Europa Press / Redacción | SANTIAGO DE COMPOSTELA | 22/08/2020 | Actualizada ás 13:30
O Centro de Investigacións Mariñas (CIMA), que depende da Consellería do Mar, iniciou un estudo sobre a explotación de macroalgas de interese comercial na comunidade co obxectivo de promover unha xestión sustentable do recurso, para o que elaborará unha guía de boas prácticas.
Así o indicou este sábado o Goberno galego nun comunicado, no que explicou que a acción se desenvolverá nas anualidades de 2020, 2021 e 2022 cun orzamento de 174.000 euros.
A intención é estudar en detalle a explotación destes recursos e a súa evolución para propor un modelo adecuado á súa realidade. Para iso empregaranse novas tecnoloxías, como drones e dispositivos submarinos, ademais de análises de imaxes de satélite para comprobar a situación dos bancos de macroalgas sen necesidade de desprazarse ás zonas.
Ademais, no estudo recompilarase información dos plans de explotación das confrarías. Con todos estes traballos búscase caracterizar a bioloxía destas especies e os requisitos para o seu cultivo para mellorar a xestión.
Así, faranse estudos de laboratorio e experiencias de cultivo e procesaranse datos dos plans de explotación das entidades que cultivan macroalgas. Con toda esta información elaborarase a guía de boas prácticas para a explotación deste recurso.
