O funcionario que fixo negocios con narcos nomeado Xefe de Servizo
Cando Evaristo Juncal cesou como delegado dunha consellería do Goberno Feijóo tras as noticias sobre as súas vendas de empresas a testaferros de narcotraficantes non volveu a súa praza. A súa muller logrou unha concesión dunha minicentral a dedo, que logo foi vendida a un procesado na Operación Nécora.
- Os negocios con narcos e políticos do "compañeiro de traballo" de Feijóo
- O PP tenta quitarlle ferro ao cese de Juncal
- O "caso Juncal" investigarase no Parlamento
- "Dorado era proveedor cando Feijóo era o nº 2 do SERGAS"
- Feijóo non se lembra quen pagou as viaxes co narco
Por Walter Burns | Caldas | 01/04/2013 | Actualizada ás 23:33
Unha concesión hidroléctica outorgada pola Xunta a dedo a esposa do ex-líder do PP de Caldas de Reis está hoxe en mans de José Alberto Aguín Magdalena, coñecido como o Rubio de Aios. Aguín Magdalena foi encausado na Operación Nécora como número dous do narcotraficante Sito Miñanco. O Rubio de Aios é administrador único da minicentral, segundo comprobou GC no Rexistro Mercantil.
O ex-líder do PP de Caldas, o funcionario Evaristo Juncal, demitiu en 2010 do seu posto como delegado da Consellería de Medio Ambiente e Infraestructuras. Fíxoo cando El País desvelou que fixera negocios con persoas relacionadas co narcotráfico, incluídos Marcial Dorado, o delincuente co que ía de vacacións Alberto Nuñez Feijóo, e o Rubio de Aios.
Curiosamente, tras abandonar este cargo. Evaristo Juncal non retornou a súa praza de funcionario.
Juncal segue ocupando un cargo de responsabilidade
Fontes sindicais informaron a GC que a Xunta nomeouno responsábel de Protección Civil en Pontevedra. Consultados por GC, voceiros oficiais do Goberno Galego aseguran que "Evaristo Juncal, funcionario da Administración autonómica, ocupa a xefatura de servizo de Emerxencias na provincia de Pontevedra aproximadamente dende hai dous anos".
É dicir, o Gobero de Feijóo degradouno -pasou de delegado provincial dunha consellería a xefe de servizo provincial- pero non o apartou de responsabilidades, como sería de esperar para unha persoa que fixo negocios con testaferros de narcotraficantes.
A Xunta teulle outro posto de responsabilidade en Emerxencias, malia non estar especializado nin ter experiencia para esta tarefa. O que se coñece vulgarmente como unha "patada para arriba".
Concesión a dedo á muller do funcionario
Cómpre ter en conta ademais que a concesión hidroléctrica foi outorgada a dedo.Era 1999 e a Xunta repartía centrais mediante autorizacións administrativas, sen concurso, o que facilitou a especulación. Os 5.000 kilowatios hora do Río Oca foron a parar a muller do funcionario, que xa daquela era responsábel local do PPdeG e posteriormente chegou alto cargo do Goberno.
A empresa en cuestión chámase Enxeñería dos Recursos Enerxéticos, S.L. e, segundo adiantou El País en 2010, non é a única minicentral que pasou da familia do político do PP a persoas vinculadas co tráfico de drogas.
En 2011 púxose en marcha a central Río Barra en Coles con 1.275 megawatios. Está operada por Minicentrales 2000 S.L., empresa da que é administradora Maria Luisa Vila Fabeiro, viuda de O Patoco, condenado ao igual que o seu marido por narcotráfico. Así o contrastou hoxe GC no Rexistro Mercantil.
Tamén fixo negocios co falecido Cruz, o amigo común de Feijóo e o narco
Ademais, Evaristo Juncal fixo negocios con Manuel Cruz. Trátase do chófer da Xunta que presentou a Nuñez Feijóo ao narcotraficante Marcial Dorado.
O presidente admitiu este luns que eran amigo do falecido Cruz (morto nun accidente en extranas circunstancias) pero asegurou descoñecer que fora testaferro de Dorado. En concreto, a familia Juncal vendeulle a contorna de Dorado a empresa J.F. Oil, hoxe chamada Gasóleos de Caldas.
Grazas á contribución dos seus lectores, GC publicará nos próximos días novos datos das relacións económicas de familiares de cargos do PPdeG con persoas presuntamente relacionadas co blanqueo do capitais.
