A cantante Silvia Penide ofrece un concerto silencioso nun escaparate para denunciar o "drama" na cultura

A cantante Silvia Penide ofreceu un concerto silencioso nun escaparate da Coruña para denunciar o "drama" da situación cultural. "Coñezo artistas que ten cero ingresos desde marzo ou que nun día cáenselle dez datas", explicou a cantautora, que, aínda que di que ofreceu algúns recitais, destaca que outros compañeiros viven "auténticos dramas".

Penide, despois de interpretar tres cancións á guitarra, reivindicou que a música é a ocupación de moitas persoas. "Non podemos buscar outro traballo. É o noso, non é un soño, un hobby, non é algo que teñamos como plan B, é do que vivimos no noso día a día", denunciou.

A artista, que dixo sentirse "emocionada", relatou que a idea xurdiu dun faladoiro coa artista plástica multidisciplinar Julia Ares, que lle cedeu o escaparate do seu taller para ofrecer o concerto. "Que mellor para chamar a atención que un concerto que non se escoite, que é o que nos está pasando", afirmou.

Penide lembrou que, ademais de cantantes e músicos, hai outros colectivos afectados, como os técnicos de son ou de iluminación, e sinalou que son todos "elos dunha mesma cadea". "Cando se apraza un concerto e dinche 2021, imaxina como te sentes cando pensas: Ata 2021 non vou ter traballo? Que fago?", denunciou.