Por Europa Press / Redacción | Santiago de Compostela | 20/10/2020 | Actualizada ás 15:53
O presidente da Xunta, Alberto Núñez Feijóo, remarcou este martes que a moción de censura impulsada por Vox "de forma unilateral" non ten como obxectivo "cambiar o Goberno" que dirixe o socialista Pedro Sánchez senón que, dentro da oposición, a formación de Santiago Abascal recupere un "protagonismo" que "está a perder".
"Esta moción non é para cambiar o Goberno, senón para tentar reformular o protagonismo da alternativa ao Goberno. É o contrario a cambiar o Goberno, o que se pretende é tratar de modificar o protagonismo dos grupos que conforman a oposición. Iso é unha moción de censura máis cara á oposición que cara ao Goberno", esgrimiu.
O tamén xefe de filas do PPdeG recalcou que Vox impulsou a moción "sen falar con ninguén" porque "probablemente lle vén ben" aínda que, baixo o seu punto de vista, "ao conxunto dos españois xa non lle vén tan ben".
"Hai moitísimos motivos para facer unha moción de censura ao Goberno, pero se queremos ser serios e facer unha proposta alternativa non podemos facer o deste partido que, de forma unilateral, para ter un protagonismo que está a perder, busca uns minutos de gloria no Congreso", esgrimiu, antes de lembrar que España vive unha situación de pandemia.
"Hai partidos na oposición moito máis responsables", contrapuxo e, preguntado por que postura debería tomar o PP (absterse ou votar en contra), replicou que é "unha cuestión perfectamente deseñada polo grupo no Congreso", que decidirá cal é a posición "definitiva" dos populares.
A xuízo de Feijóo, o Grupo Popular "tomará a decisión que considere oportuna" ante unha moción na que "non se censura ao Goberno, senón á alternativa do Goberno".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.