Galicia camiña cara ao abismo con rexistros históricos de máis defuncións que nacementos
O primeiro trimestre de 2020 deixa o peor dato de nacementos en Galicia desde que hai rexistros, con só 3.820.
Por Europa Press / Redacción | SANTIAGO DE COMPOSTELA | 29/10/2020 | Actualizada ás 12:09
O número de nacementos que houbo en Galicia no primeiro trimestre de 2020 é o peor dato desde que hai rexistros no Instituto Galego de Estatística (IGE) --desde 1996--, con só 3.820.
Galicia rexistra un saldo vexetativo negativo en 5.193 persoas nos primeiros tres meses deste ano. Deste xeito, producíronse 3.820 nacementos --1.929 nenos e 1.891 nenas-- fronte a 9.013 mortes --4.374 homes e 4.639 mulleres--.
Isto tira un saldo vexetativo que empeora respecto ao mesmo período de 2019, cando houbo 3.861 alumeamentos e 8.752 defuncións. De feito, ao peche de 2019 só cinco concellos galegos tiñan un saldo vexetativo positivo: Ames (+72), O Porriño (+41), Salceda de Caselas (+29), Arteixo (+17), Ribadumia (+2).
DESCENSO DE MATRIMONIOS
Pola súa banda, os matrimonios descenden no primeiro trimestre do ano. Foron un total de 987, o que supón 258 menos (-20,7%) que os tres primeiros meses de 2019.
Entre o total destas ligazóns, 967 producíronse entre persoas de diferente sexo, mentres que os 20 restantes foron entre persoas do mesmo sexo.
