A UDC estudará os desafíos que afrontan 13 rexións europeas dependentes do carbón, incluída As Pontes

O Grupo de Investigación Persoa-Ambiente da Universidade da Coruña (UDC) presentou o proxecto Entrances, que lidera a nivel europeo e que ten un financiamento de tres millóns de euros. O plan analizará e ofrecerá recomendacións para os "desafíos" de 13 rexións europeas que dependen ou teñen consumo intensivo de carbón, entre as que estará As Pontes.

O coordinador do grupo, Ricardo García Mira, explicou que os investigadores porán en común as "implicacións sociais e as oportunidades de enerxía limpa, así como os vínculos entre comunidades e territorios". O proxecto fórmano, dixo, 14 universidades e centros de 12 países europeos.

O profesor Fernando González Laxe, que participa na investigación, apuntou, á súa vez, que Galicia "usou un elevado stock de recursos naturais" e con respecto ás Pontes advertiu de que ten unha "alta dependencia" da central térmica e que o impacto social e laboral chega a Ferrol e á provincia de Lugo.

O grupo de investigación que integra este estudo confórmano 20 profesionais de ámbitos como a psicoloxía, a arquitectura ou a educación ambiental e que manteñen contactos "estables" con 33 países do mundo. Ademais de Entrances, tamén traballan no proxecto Locaw, sobre sustentabilidade, e Glamurs, sobre estilos de vida e economía verde.

Durante a presentación, a profesora Cristina García Fontán informou de que en setembro do ano que vén celébrase o Simposium Internacional da Rede de Sustentabilidade da asociación IAPS na que ela será a presidenta do comité organizador.