O alcalde de Ferrol esixe a Navantia que acometa o dique cuberto cos fondos de recuperación europeos

O alcalde de Ferrol, o socialista Ángel Mato, esixiu a Navantia que presente o proxecto do dique cuberto para o estaleiro de Ferrol "aos plans de recuperación europeos aos que vai optar este país", ao entender que ese investimento "é asumible e, ademais, imprescindible para a transformación dixital da economía tal e como figura no propio plan". Este paso, dixo, "é fundamental para a viabilidade futura da empresa pública Navantia", na que "a carga de traballo é fundamental, pero a súa transformación o que vai garantir é seguir sendo competitivo dentro de vinte ou trinta anos como construtora naval", apuntou.

Mato destacou que este plan é "un proxecto maduro", traballado desde o ano 2015 por parte dunha unidade mixta de investigación (UMI), formada pola propia empresa e a Universidade da Coruña (UDC) e que "no ano 2018 ía xa pola oitava revisión e estaba a piques de ser presentado pola dirección de Navantia á SEPI para a súa execución".

PARALIZADO POLO CAMBIO DE GOBERNO

O rexedor socialista detallou que foi a moción de censura que posibilitou a chegada de Pedro Sánchez á Moncloa a que paralizou esa iniciativa, "xa que simplemente este proxecto quedou enriba da mesa polo cambio de Goberno e, consecuentemente, o cambio da dirección que se produciu tamén coa modificación do Executivo".

Por outra banda, asegurou que lles deu traslado desta demanda "aos ministerios de Industria, Defensa, Facenda e Economía" e que este luns recibiu "unha comunicación da vicepresidenta Nadia Calviño na que se interesaba por esta cuestión vital para Ferrol".

O alcalde de Ferrol tamén quixo solicitarlle ao presidente da Xunta, Alberto Núñez Feijóo, "o seu apoio institucional para poder trasladarlle ao Goberno de España a importancia da modernización do estaleiro de Ferrol, como un dos proxectos máis importantes para o naval galego".

Segundo os datos que expuxo Mato, "o custo completo da transformación dixital de Navantia roldaba no seu momento os 440 millóns de euros", mentres que o dique seco e a nave que o cubriría situaríase "nos 195 millóns de euros, unha cantidade perfectamente asumible e que suporía que con esta infraestrutura aforraríase uns 36 millóns de euros na fabricación dunha fragata e uns 62 nas dun buque tipo LHD".

"Navantia ten que dar un paso á fronte porque se trata dun proxecto que non xorde da nada, está moi traballado e forma parte dos plans industriais", de modo que "non hai ningunha escusa para que non se aborde", sentenciou.