Por Europa Press / Redacción | SANTIAGO DE COMPOSTELA | 29/12/2020 | Actualizada ás 20:23
O Diario Oficial de Galicia (DOG) publicou este martes, 29 de decembro, a Oferta de Emprego Público da Administración Xeral da Xunta para o ano 2020, que inclúe 2.585 prazas de acceso libre e 3.419 para funcionarización. A convocatoria esgota a taxa de reposición marcada polo Estado.
A principal novidade fronte aos anexos de prazas que se abordaron cos sindicatos na mesa de negociación e que posteriormente se votaron na comisión de persoal o 1 de decembro radica na inclusión de cen prazas de funcionarización --conversión de persoal laboral fixo en funcionario-- que non se someteron a aprobación no máximo órgano de representación dos traballadores públicos, aínda que foron abordadas nunha reunión posterior.
Neste centenar de prazas, como se pode comprobar no anexo V do Diario Oficial de Galicia, hai 12 reservadas para persoal laboral fixo coa especialidade de Camiños, Pontes e Canles, xunto con outra praza máis para unha persoa titulada en enxeñaría técnica agrícola. Na convocatoria que aparece no DOG non se especifica, pero todos estes postos correspóndense con persoal laboral fixo de extíngaa Eposh --Empresa Pública de Obras e Servizos Hidráulicos--, que agora están provisionalmente adscritos ao ente Augas de Galicia.
De feito, pódese comprobar esta equivalencia (de prazas co posto ao que se refire) na documentación das negociacións entre sindicatos e Administración autonómica levadas a cabo neste mes de decembro e que tiñan como obxectivo a modificación que finalmente se produciu no DOG, pero que non foi aprobada na comisión de persoal. Por tanto, a Consellería de Facenda decidiu incluír xa na presente OPE unhas prazas que non tiveron o aval da maioría sindical na Administración Xeral da Xunta.
MODIFICACIÓN DA LEI DE ACOMPAÑAMENTO
A inclusión destas 12 prazas de enxeñeiro de Camiños e a de técnico agrícola coincide no tempo coa tramitación dos orzamentos da Xunta e a lei de medidas fiscais e administrativas, a coñecida como lei de acompañamento, a cal permitirá que a partir de 2020 os funcionarios que procedan de entes instrumentais (como é a Eposh) cobren máis en concepto de trienios que os funcionarios de carreira.
Esta diferenza salarial débese a que os funcionarios de carreira teñen unhas contías fixas por trienio, mentres que este plus no caso do persoal laboral fixo da Xunta dalgúns entes instrumentais calcúlase cunha porcentaxe (da contorna do 5%) sobre o salario bruto, que adoita ser máis alto.
UN COMPLEMENTO ADICIONAL PARA ESTE PERSOAL
O cambio da lei de acompañamento incumbe ao persoal laboral fixo procedente das entidades instrumentais do sector público autonómico, o que se coñece como administración paralela ou "chiringuitos", e que pase a formar parte da Administración autonómica --por extinción, por exemplo, dese ente--, de forma voluntaria.
E significa, esta modificación, que este persoal terá dereito a un complemento adicional (á marxe do complemento persoal de integración) se no seu posto de orixe percibía en concepto de antigüidade cantidades superiores ás do convenio colectivo único. Este plus consistirá na diferenza (positiva) entre a cantidade percibida por antigüidade no momento anterior á integración e a cantidade resultante de aplicar o que establece o decreto nesta materia.
Ademais, permanecerá coa mesma contía independentemente das variacións nos restantes conceptos retributivos e manterase mesmo no caso de funcionarización deste persoal laboral integrado, segundo recolle esta disposición adicional.
CSIF APUNTOU Á CONSELLEIRA ETHEL VÁZQUEZ
Ao transcender a lei de acompañamento dos orzamentos, o sindicato CSIF apuntou á conselleira de Infraestruturas e Mobilidade, Ethel Vázquez, como beneficiaria deste cambio na lexislación para a funcionarización, xa que ela é traballadora en excedencia da antiga Eposh, integrada en Augas de Galicia.
Precisamente, Ethel Vázquez, que cobra 13.443 euros en concepto de trienios (máis que o titular de Facenda e o propio presidente da Xunta, que perciben 6.743 euros cada un), é titulada en enxeñaría técnica superior de Camiños, Canles e Portos pola Universidade da Coruña, datos todos eles que figuran na web de Transparencia da Xunta de Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.