Temor polos intereses da frota que faena no Gran Sol ante o Brexit
Ao impacto directo na frota galega súmase que os buques británicos non se verán sometidos á Política Pesqueira Común nin as normativas como o deber de desembarque.
Por E.P. | SANTIAGO DE COMPOSTELA | 20/01/2021 | Actualizada ás 19:25
A conselleira do Mar, Rosa Quintana, pediu unha estratexia común para defender os intereses da frota que faena no Gran Sol nas futuras negociacións de posibilidades de pesca tanto no seo da UE como co Reino Unido.
Así o demandou durante a súa participación por videoconferencia no Consello Consultivo de Política Pesqueira para Asuntos Comunitarios, que serve de preparación para o próximo Consello de Ministros de Pescade a Unión Europea.
A Xunta, que informou do encontro nun comunicado, lembra que para o tres primeiros meses deste ano nas poboacións de peixes compartidas co Reino Unido, como as das augas do Gran Sol, establecéronse unhas cotas estables e proporcionais ás fixadas para 2020. Pola súa banda, as cotas para despois dese período deben determinarse neste primeiro trimestre previa negociación das partes.
Rosa Quintana volveu a trasladar a preocupación de Galicia sobre as consecuencias do acordo do brexit para o sector marítimo-pesqueiro tras a cesión ao Reino Unido do 25% das posibilidades de pesca europeas por parte do Executivo comunitario a cambio do acceso ás augas británicas durante só cinco anos e medio.
Ao impacto directo na frota galega, conforme sinala a Xunta, súmanse outros aspectos como que os buques británicos non se verán sometidos á Política Pesqueira Común nin as normativas como o deber de desembarque.
PETICIÓN DO MINISTRO Á UE
Pola súa banda, o ministro de Agricultura, Pesca e Alimentación, Luís Planas, solicitou á Comisión Europea certeza e celeridade na fixación definitiva de TACs (Total Admisible de Capturas) con Reino Unido para 2021.
O titular de Agricultura presidiu os Consellos Consultivos de Política Agrícola e de Politica Pesqueira para Asuntos Comunitarios, coa participación dos conselleiros das comunidades autónomas, para analizar os asuntos que se tratarán no Consello de Ministros de Agricultura e Pesca da Unión Europea, que terá lugar a próxima semana, por videoconferencia.
En relación cos efectos do brexit no sector pesqueiro, Planas sinalou que a Unión Europea ten agora a tarefa de chegar a un acordo co Reino Unido sobre a fixación definitiva de TACs para 2021, ou 2022 no caso das especies profundas, para os stocks compartidos.
Dado o gran número de stocks compartidos co Reino Unido, a proposta que finalmente se adoptou no Consello do pasado mes de decembro foi un adianto de cota provisional ata o 31 de marzo, do 25%. Entre estes stocks, atópanse principalmente especies pelágicas como xurelo, caballa ou bacaladilla.
