Se vives só poderás formar parte dunha "unidade de convivencia ampliada" na nova corentena

As persoas que en Galicia viven en solitario poderán afrontar os próximas tres semanas de severas restricións para tentar frear a propagación do coronavirus sen sentirse soas, xa que a Xunta crea a "unidade de convivencia ampliada", que lles permitirá saltarse a norma de que só están autorizadas interaccións sociais con convivientes baixo o mesmo teito.

O Diario Oficial de Galicia (DOG) publicado a noite deste martes estipula que están exentas das limitacións de reunións de só convivientes "as persoas que viven soas, que poderán formar parte dunha única unidade de convivencia ampliada" e aclara que "cada unidade de convivencia pode integrar soamente a unha única persoa que viva soa".

Así mesmo, tamén quedan exentos de cumprir a norma de que só se permiten reunións familiares, sociais e lúdicas de persoas que pertencen ao mesmo núcleo ou grupo de convivencia os casos de menores de idade cuxos proxenitores non conviven no mesmo domicilio e os matrimonios ou parellas que viven en casas diferentes.

Así mesmo, séguese permitindo a reunión para o coidado, a atención, a asistencia ou o acompañamento a persoas menores de idade, persoas maiores ou dependentes, con discapacidade ou especialmente vulnerables.

Tamén están aceptadas reunións por actividades laborais, institucionais, empresariais, profesionais, sindicais, de representación de traballadores e administrativas, actividades en centros universitarios, educativos, de formación e ocupacionais, "sempre que se adopten as medidas previstas nos correspondentes protocolos de funcionamento". O DOG insiste, no entanto, en que "se recomenda restrinxir ao máximo a interacción social e que os encontros queden limitados unicamente á unidade de convivencia".

NOVO CONFINAMENTO

Ás 00,00 deste mércores entraron en vigor as novas restricións implantadas pola Xunta para loitar contra a pandemia do coronavirus. Entre as medidas atópase o peche perimetral dos 313 concellos de Galicia, así como o peche total da hostalaría e a limitación das reunións a só entre persoas convivientes.