Traballadores de Axuda no Fogar, os primeiros en recibir a vacina de AstraZeneca este xoves
Só a poderán recibir os menores de 55 anos.
Por Europa Press / Redacción | SANTIAGO DE COMPOSTELA | 10/02/2021 | Actualizada ás 13:18
Galicia comezará a administrar este xoves as doses recibidas da vacina de AstraZeneca entre os traballadores do Servizo de Axuda no Fogar (SAF) menores de 55 anos, un proceso que se desenvolverá "en paralelo co resto de grupos establecidos".
Así o apuntou este mércores o conselleiro de Sanidade, Julio García Comesaña, que compareceu en rolda de prensa para informar os asuntos tratados na última reunión do comité clínico. O conselleiro lembrou que as vacinas son "a gran esperanza que ten neste momento a humanidade" contra a covid-19 e garantiu que Galicia está a pór "o máximo esforzo" en vacinar á súa poboación "canto antes".
Este luns, apuntou, chegaron a Galicia 19.890 novas doses da vacina de Pfizer e 11.100 de AstraZeneca, un primeiro envío que, segundo o acordado a nivel estatal, non poderá empregarse en menores de 55 anos, o que está a obrigar a reformular o calendario vacunal.
A comunidade terminou xa a pauta completa nas residencias de maiores e este martes concluíu a administración da segunda dose aos sanitarios de primeira liña. Paralelamente, este mércores iniciouse o proceso co resto de sanitarios.
NOVO GRUPO
A maiores, Julio García Comesaña apuntou que, mentres se dirimen outros grupos aos que poderían destinarse as vacinas de AstraZeneca cando se inicie o proceso en maiores de 80 anos, Sanidade decidiu iniciar a administración das 11.100 doses xa recibidas entre o persoal do Servizo de Axuda non Fogar menor de 55 anos, algo que comezará xa o xoves.
VACINACIÓN EN DOMUSVI
Finalmente, preguntado acerca da vacinación da conselleira delegada das residencias DomusVi, García Comesaña afirmou que Galicia é "extremadamente estrita" nos criterios de vacinación e na priorización dos traballadores das residencias e dos seus usuarios. "Se a persoa da que me fala entraba con frecuencia nas residencias, está ben vacinada, porque ese era o obxectivo do primeiro grupo", resolveu.
