Lorient acolle a estrea internacional da Selección Galega de fútbol gaélico
Dezaoito xogadores viaxan a Armórica para participar o domingo 11 nun amigable contra a Selección Bretona no marco do Festival Intercéltico. Tres coruñesas, na Selección Europea.
Por gcdeportes | Compostela | 06/08/2013 | Actualizada ás 13:40
Non todo é música en Lorient. O fútbol gaélico coarase entre as músicas de Sinead O’Connor e Nolwenn Leroy. E Galicia, coma non, será protagonista. A Selección galega masculina enfrontarase, no marco do Festival Intercéltico da Bretaña, á selección local. Será o vindeiro domingo 11 a partir das 14 horas no Estadio de Karolay. Galicia e Bretaña son ata o de agora as únicas seleccións oficiais que existen neste deporte, xa que a de Irlanda só compite con Australia en partidos de regras mixtas de fútbol gaélico e australiano.
Hai dezaoito convocados polo adestrador Carlos Seco para a cita internacional: Pablo Bregua, Fran, Julián, Sebas, Brais, Carlos Seco, Pablo Miragaya, Óscar e Alberto, do equipo A Coruña Fillos de Breogán; Wences, Dani Vázquez, Pablo Fuentes e Pedro Alberte, de Ártabros de Oleiros; Kanario, Lupo e Brito, de Bráithreachas A Estrada; e Miguel e Corba, dos Irmandinhos A Estrada. A estrea da Selección Galega feminina tivo que ser suspendida. Cuestións económicas e persoais impediron conformar un equipo para viaxar a Lorient.
O 20 de xullo de 2012 en Narón, galegos e bretóns estreáronse no que foi un partido histórico que gañaron os locais por 23 a 17. Desta volta en Lorient, de novo os bretóns son favoritos. Contan con liga propia dende 1996 e Liffré, o campión bretón deste ano, proclamouse tamén vencedor no Campionato de Francia e as Illas do Canal, derrotando na final ao Jersey Irish.
A primeira competición oficial galega (7 contra 7) xogouse no primeiro trimestre deste ano. Participaron cinco equipos e resultou vencedor Bráithreachas A Estrada. No outono comezará a Liga Absoluta (11 contra 11) coa participación dun novo equipo, Pontevedra Fútbol Gaélico.
Tres coruñesas na Selección Europea
Por outra parte, e por primeira vez na historia, tres xogadoras galegas, de A Coruña Fillas de Breogán, foron convocadas coa Selección Europea feminina. Patri, Kamy e Marta (fundadoras da sección feminina do club coruñés) participarán así no All-Ireland de 7 contra 7 que terá lugar en Portmanock (Irlanda) o 28 de setembro. Ademais, asistirán á final do All-Ireland feminino en Croke Park.
Antes de ter xogadoras dabondo para fundar o equipo, no 2011 xogaron nas filas do Madrid Harpettes (o equipo con mellor palmarés de España) no Campionato Ibérico. Agora mesmo hai xa tres equipos femininos en Galicia: Fillas de Breogán, Irmandinhas e Mecas.
