A formación de servizos de emerxencias será reforzada para a súa intervención nos actos do Xacobeo

Dirixidos a profesionais das emerxencias, axentes forestais e ambientais, socorristas, persoal dos grupos de emerxencias municipais ou voluntarios, os cursos da AGASP teñen como obxectivo mellorar a preparación dos profesionais que traballan na primeira liña de atención á poboación.

Por E.P. | SANTIAGO DE COMPOSTELA | 16/02/2021 | Actualizada ás 16:39

Comparte esta noticia

O Consello Reitor da Academia Galega de Seguridade Pública (AGASP) reuniuse este martes para, entre outras cuestións, aprobar o plan anual de actividades para este ano, que destaca por un incremento notable dos cursos de formación a causa do Xacobeo 2021-2022.

Así, explicou a Xunta, tendo en conta as circunstancias especiais deste ano Santo, marcado pola pandemia "pero sen renunciar á celebración dun número importante de eventos cando a situación sanitaria o permita", o Consello Reitor deu luz verde a un "importante incremento das actividades formativas" para este ano.

No servizo de Formación en Emerxencias, fronte ás 46 actividades que levaron a cabo no 2020 e nas que participaron 1.719 persoas, está previsto organizar este ano 150 programas, cun número de asistentes que superará os 3.850 matriculados.

Dirixidos a profesionais das emerxencias, axentes forestais e ambientais, socorristas, persoal dos grupos de emerxencias municipais ou voluntarios, os cursos da AGASP teñen como obxectivo mellorar a preparación dos profesionais que traballan na primeira liña de atención á poboación.

ACTIVIDADE EN 2020

Na reunión do Consello Reitor tamén se informou da actividade do servizo en Seguridade Pública ao longo do 2020, que destacou por formar a promoción de Policía Local máis numerosa da Academia, con 134 alumnos que se repartiron en cinco grupos e que asistiron a un total de 4.500 horas lectivas.

Este ano, ademais, formarase a décimo terceira promoción da Policía Local, con 94 alumnos que xa están en proceso de selección e que farán o primeiro e o segundo exercicio das probas selectivas o 26 de febreiro.

Tamén levaron a cabo no 2020 os procesos para a selección de 149 prazas de policía e 119 de axentes auxiliar de Policía Local. O servizo realizou o ano pasado 68 actividades ao longo de 6.189 horas lectivas, con 2.066 prazas e 1.608 diplomados. Para este ano está previsto realizar 73 cursos con 3.323 prazas e 1.864 horas lectivas dirixidos ás forzas de seguridade.

As medidas de seguridade pola covid-19 obrigaron a intensificar no 2020 a formación en liña, e así seguirá sendo este ano, no que están previstos quince novos programas formativos como cursos de idiomas, cursos de linguaxe da administración en galego, cursos de ofimática e sesións de autoformación na Rede.

Coche da Policía Autonómica
Coche da Policía Autonómica | Fonte: Xunta.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta