"Todos os directivos da Agader teñen que ser enxeñeiros agrónomos?", di a Xunta para descartar un "dedazo"
O PSdeG denunciou que a Xunta deulle a un ex deputado popular unha praza "a dedo".
Por E.P. | SANTIAGO DE COMPOSTELA | 24/02/2021 | Actualizada ás 21:14
O conselleiro de Medio Rural, José González, defendeu o perfil do exdeputado do PP Moisés Blanco para ocupar un cargo directivo na Axencia Galega de Desenvolvemento Rural (Agader), unha designación na que o PSdeG ve un "dedazo".
González censurou que o deputado socialista Martín Seco leva a pleno esta cuestión, que encadra na intención de "criticar por criticar" da oposición, pois defendeu a validez de Blanco para un posto para o que, segundo o conselleiro, foi seleccionado a través dun procedemento público ao que optaron "varios candidatos" sen que "ningún presentase" queixa formal.
En concreto, o deputado do PSdeG denunciou que a praza fose "asignada a dedo" ao deputado popular durante a pasada lexislatura (figuraba nas listas do PP ouresano, pero non obtivo escano) cando Branco "é unha persoa sen ningún tipo de coñecemento nin experiencia na xestión fondos", o que o levou a sentenciar que foi seleccionado polo "mérito" de "ser un destacado militante" do Partido Popular.
Na súa resposta, José González outorgou validez ao perfil como docente de Moisés Blanco para ocupar este posto na Agader. "Todos os directivos da Agader teñen que ser enxeñeiros agrónomos?", preguntouse o conselleiro tras censurar que "se critique" que un docente ocupe un cargo directivo no medio Rural cando existe "unha longa lista" de exemplos deste tipo durante o goberno bipartito.
