Por Europa Press / Redacción | A CORUÑA | 02/03/2021 | Actualizada ás 11:31
A conselleira do Mar, Rosa Quintana, reclamou que o Goberno central indemnice aos mariscadores da Ría do Burgo mentres dure a obra de dragado da zona e cualificou o debate sobre que administración debe pagar as compensacións de "absurdo".
"Quen fai unha obra, quen é o promotor, é o que debe facer as indemnizacións correspondentes; sempre foi así", apuntou en declaracións aos medios na Coruña. Quintana considera "lóxico" que a administración que realiza o proxecto sexa o que compense aos afectados.
A responsable autonómica afirmou que a Xunta sempre foi "leal e construtiva" co Executivo estatal e lembrou que propuxo crear un fondo para estas indemnizacións ao que achegaría 100.000 euros. Coas doazóns doutros concellos e o 50% a cargo do Estado, dixo, resultaría un montante "dun millón de euros para o sector".
Quintana reprochou ao Goberno que se incrementase en dous millóns de euros o proxecto para "mellorar paseos e zonas verdes" dos municipios limítrofes e non se faga para os mariscadores. "Se había para indemnizar a eses Concellos, moito máis ten que habela para indemnizar aos profesionais que non van poder desenvolver a súa actividade mentres duren as obras de acondicionamento", censurou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.