Os casos de covid en residencias de maiores baixan a 41 en Galicia e sen novos centros afectados
Por E.P. | SANTIAGO DE COMPOSTELA | 19/03/2021 | Actualizada ás 14:01
Os casos activos de covid-19 nas residencias de maiores de Galicia baixaron a 41: 38 usuarios, un menos que na pasada xornada, tras darse un alta na residencia DomusVi Laraxe de Cabanas, e tres traballadores. Os casos están concentrados en catro centros na Comunidade.
Segundo os datos actualizados este venres polas consellerías de Política Social e Sanidade, nas últimas horas non se computou ningún novo caso de covid-19. Así, a Residencia Coviastec de Silleda (Pontevedra) mantense como o centro con máis casos activos entre usuarios, cun brote de 33 positivos; mentres que o da Residencia Santa Mariña de Xinzo de Limia segue con catro casos; e só un usuario de DomusVi Laraxe de Cabanas continúa como enfermo de covid, tras un alta rexistrada.
Pola súa banda, os traballadores contaxiados seguen sendo tres: un na residencia de maiores de Caranza, e dúas na residencia Coviastec de Silleda. En canto aos centros de discapacidade seguen sen presentar ningún caso entre os seus usuarios nin entre os seus traballadores.
