A Xunta planea sumar actividades sanitarias e tecnolóxicas aos centros no seu futuro plan de educción
A Consellería de Educación abre agora unha rolda de contactos para enriquecer esta folla de ruta dos colexios da era poscovid.
Por Europa Press / Redacción | SANTIAGO DE COMPOSTELA | 20/03/2021 | Actualizada ás 18:45
O conselleiro de Cultura, Educación e Universidade, Román Rodríguez, explicou que o 'Plan de Nova Arquitectura Pedagóxica' que prepara a Xunta prevé sumar nos centros educativos non só as "necesidades académicas", senón "tamén as sanitarias e as tecnolóxicas".
Así o asegurou Rodríguez durante unha visita realizada este sábado ao CEIP Xoaquín Loriga de Lalín, un colexio no que precisamente a Administración acometerá unha rehabilitación integral que se rexerá segundo as premisas marcadas no plan.
Trátase dun documento que o pasado xoves aprobou o Goberno galego, con 191 millóns de euros entre 2021 e 2024 destinados aos 1.100 centros públicos de ensino de titularidade da Xunta, que pretende que estas instalacións acollan actividades para a poboación xeral.
O conselleiro de Educación espera que este plan supoña "un cambio radical de concepto" en canto ao deseño dos centros, que a partir de agora estarán "pensados e configurados para afrontar os retos educativos do futuro", aínda que tamén sumarán funcións sanitarias e tecnolóxicas.
O documento, dixo, "será a guía para a definición e o deseño dos novos espazos educativos", de modo que "dean resposta ás necesidades educativas, sanitarias e tecnolóxicas do futuro" con espazos abertos á interacción social e, mesmo, "máis sustentables" a nivel ambiental.
Así, todas as reformas de espazos e os novos centros educativos que leven a cabo en Galicia ata 2024 --cuxas actuacións específicas concretará a Xunta "proximamente"--, seguirán as pautas e os obxectivos incluídos no plan.
