O programa de detección precoz de cancro colorrectal chegou a 450.000 galegos desde 2013
A través de cribados, apuntou Sanidade, identificáronse 1.436 cancros invasivos, dos que o 67 por cento estaban en estadios precoces nos que o seu prognóstico "é significativamente mellor".
Por E.P. | SANTIAGO DE COMPOSTELA | 31/03/2021 | Actualizada ás 16:09
Unhas 450.000 persoas participaron no programa galego de detección precoz de cancro colorrectal desde a súa posta en marcha no ano 2013, segundo destacou este mércores a Consellería de Sanidade con motivo do Día Mundial contra o cancro de colon.
Por iso, Sanidade incide na importancia da detección precoz desta enfermidade, polo que fai un chamamento á poboación para que participe nos cribados do programa galego de detección precoz do cancro colorrectal. Esta iniciativa está dirixida a homes e mulleres de 50 a 69 anos e o seu obxectivo, engade, "é detectar precozmente esta enfermidade".
Respecto diso, o conselleiro de Sanidade, Julio García Comesaña, animou aos galegos, nun acto en Abegondo, a "que participen no cribado de cancro de colon" que realiza o Sergas. Este programa comezou a funcionar en 2013 e participaron nel 449.672 persoas. Durante ese tempo e ata decembro de 2019 enviáronse 1.046.823 invitacións e participaron no programa o 44,39 por cento das persoas convidadas, sete puntos máis en mulleres (47,7%) que en homes (40,8%).
Ao analizar a participación, Sanidade resalta que aquelas persoas que participaron algunha vez volven facelo nun 91,6%. Desde o inicio do programa e ata decembro de 2019 realizáronse colonoscopias a 26.647 persoas.
CANCROS INVASIVOS
Con estas probas, apuntou Sanidade, identificáronse 1.436 cancros invasivos, dos que o 67 por cento estaban en estadios precoces nos que o seu prognóstico "é significativamente mellor" (49% en estadio 1 e 18% en estadio 2). Ao comparar estes resultados cos dos cancros colorrectais detectados fóra do cribado, soamente o 14% son diagnosticados en estadio 1. Ademais dos cancros tamén se identificaron 4.736 persoas con adenomas de risco alto, 6.572 de risco medio e 5.983 de risco baixo.
A Consellería de Sanidade subliñou que completou a cobertura total a toda a poboación obxectivo do programa galego de detección prevoz "cinco anos antes do que establece a carteira básica común de servizos do Sistema Nacional de Saúde". E puntualizou que aínda que por mor da pandemia "houbo que aprazar os chamamentos do cribado desde marzo do ano pasado", o Sergas "retomou as citas de precolonoscopias e colonoscopias pendentes en canto recuperouse a actividade no mes de maio".
O cancro colorrectal representa o tumor maligno máis frecuente na poboación, lembra Sanidade, que apunta que nas mulleres "é o segundo en incidencia por detrás do de mama"; e nos homes, o terceiro despois do cancro de pulmón e de próstata. En relación á mortalidade representa a segunda causa de morte por cancro tanto en homes como en mulleres e constitúe "a quinta causa de mortalidade en Galicia", matiza Sanidade.
