Detida a organizadora da festa ilegal en Marbella na que morreu o dj galego por un disparo
Tamén están acusados dous homes de nacionalidade alemá, un deles como autor material dos feitos.
Por E.P. | MÁLAGA | 01/04/2021 | Actualizada ás 17:59
Axentes da Policía Nacional detiveron a outra persoa máis en relación coa festa ilegal no municipio malagueño de Marbella na que morreu un home por un disparo no pescozo, que ao parecer actuaba como dj. En total, e polo momento, son tres persoas as detidas en relación con estes feitos, xa que a investigación continúa aberta.
O dj JM Ares, que faleceu na festa ilegal na madrugada deste domingo, 28 de marzo, ao luns, día 29, era natural de Ferrol. José María Ares, de 40 anos, facíase chamar dj JM Ares e era coñecido entre os seus amigos como Chema.
A última arrestada en relación a estes feitos foi unha muller española, ao parecer, organizadora da festa. En concreto, impútanselle os delitos de omisión do deber de socorro e encubrimento e pasará a disposición nos xulgados de Marbella, segundo informaron fontes policiais.
Doutra banda, as dúas persoas detidas o pasado martes pasaron este xoves a disposición xudicial nos xulgados de Málaga. Trátase dun home de 30 anos e nacionalidade alemá como presunto responsable do homicidio; e outro home de 28 anos e nacionalidade alemá como presunto responsable dun delito de encubrimento. As detencións practicáronse coa colaboración dos GOES e o Grupo de Homicidios de Málaga, momentos antes de que ambos os arrestados tentasen fuxir do país. A investigación policial continúa aberta.
