Capital Energy, lista para instalar un parque eólico en Vila de Cruces

Capital Energy deu un paso adiante no desenvolvemento do seu parque eólico 'Cunca', de 22,5 megawatts (MW) e que suporá un investimento duns 20 millóns de euros, despois de que a Consellería de Economía da Xunta de Galicia sometese a información pública a solicitude de autorización do proxecto, que será o seu cuarto parque eólico en Galicia, informou a compañía.

Situado no concello de Vila de Cruces, na provincia de Pontevedra, o parque contará con cinco aeroxeradores que serán capaces de fornecer preto de 66.000 megawatts hora (MWh) de enerxía limpa ao ano, equivalentes ao consumo de máis de 27.000 fogares galegos, e evitarán a emisión anual á atmosfera de máis de 26.300 toneladas de dióxido de carbono (CO2).

O proxecto propiciará ademais a creación de ata 130 empregos durante a súa fase de construción e terá un impacto económico anual nas arcas (canon eólico) e locais (IBI e IAE), así como a través dos contratos de arrendamento, de preto de 154.000 euros. A esta contía recorrente súmase o pago puntual do ICIO, que ascenderá a 600.000 euros.

Recentemente, o Goberno da Xunta tamén someteu a información pública os tres primeiros parques eólicos do grupo enerxético en Galicia, na provincia da Coruña: Banzas, Maragouto e Troitomil, que contarán cunha potencia instalada de 31 MW, 35 MW e 30 MW, respectivamente.

O desenvolvemento destes catro proxectos eólicos supón unha potencia total de case 120 MW.

A empresa fundada por Jesús Martín Buezas conta a día de hoxe con ao redor de 40 proxectos renovables en Galicia, todos eles eólicos, distribuídos nas catro provincias. Suman unha potencia conxunta de case 1.100 MW e o seu desenvolvemento suporá un investimento global de aproximadamente 780 millóns de euros.

Capital Energy conta na actualidade en España e Portugal cunha carteira de proxectos eólicos e solares que rolda os 38 xigavatios (GW) de potencia, dos que máis de 8,5 GW xa dispoñen dos permisos de acceso á rede concedidos.